Макгрегор-Чендлер: Бошланмаган жанг UFC рекордини янгилади

Ушбу жангнинг ўтказилишига ҳали бир ярим ой вақт бор, аммо ҳозирнинг ўзида тарихий рекорд қайд этиб улгурди.

Конор Макгрегор ва Майкл Чендлер ўртасидаги жанг яримўрта вазн тоифасида ташкил этилади ва 29 июнь куни АҚШнинг Лас-Вегас шаҳрида ўтказиладиган UFC 303 турнирининг марказий тўқнашуви бўлади.

Гап шундаки, бу жанг ҳозирнинг ўзида UFC промоушенининг молиявий рекордини янгилади. Турнир учун чиқарилган чипталар 20 миллион доллардан ошиқроққа сотиб бўлинган. Бу маълумотни UFC on ESPN 56 турниридан кейинги матбуот анжуманида шахсан ташкилот раҳбари Дана Уайт айтган.

Эътиборлиси, бундан аввалги рекорд ҳам айнан Конор Макгрегор иштирокидаги жангга тегишли эди. Унинг 2016 йилнинг ноябрь ойида Нью-Йоркдаги UFC 205 турнири доирасида енгил вазн чемпионлиги учун Эдди Альваресга қарши ўтказган жанги чипталари 17.7 миллион долларга сотилган эди.

Хабиб Нурмагомедов ва Конор Макгрегор ўртасида 2018 йилнинг октябрь ойида UFC 229 турнири доирасида ўтказган жанги 17.2 миллион долларга пулланганди. UFC 300 турнири чипталаридан эса 16.5 миллион доллар даромад қилинганди.