Россия Тергов қўмитаси ўлим жазосини тиклашни таклиф қилди

Россия Тергов қўмитаси раиси Александр Бастрикин Россияда ўлим жазосига қўйилган мораторийни бекор қилиш таклифи билан чиқди.

Унинг сўзларига кўра, бунинг учун конституцияни ўзгартириш ва референдум ўтказишнинг ҳожати йўқ — президент Владимир Путиннинг фармони етарли бўлади. Сиёсатчининг фикрича, Россияда оғир жиноятлар сони ортиб бораётганини ҳисобга олиб, ўлим жазосига мораторийни бекор қилиш керак. У мазкур қарор биринчи навбатда, иқтисодий сабабларга кўра амалга оширилиши кераклигини, чунки давлат маҳбусларни қамоқхоналарда сақлаш учун катта маблағ сарфлаётганини таъкидлаган.

Унинг қўшимча қилишича, бир маҳкумни сақлаш йилига 30 минг рублга (тахминан 350 доллар) тушади. У умрбод қамоқда ўтирганларнинг ҳар бирини ҳисоблаганда катта бюджет бўлишини қўшимча қилган. Бу хавфсизлик, колонияларнинг катта сонини сақлаш ва маҳбусларни даволаш ҳамда озиқ-овқат билан таъминлашни ўз ичига олишини айтган. Бастрикин, шунингдек, ўлим жазосини қайтариш ҳақидаги таклифини инсонпарварликка интилиш билан изоҳлаган.

Менимча, 70, 80, 100 кишини ўлдирган маняк ўлим жазосига ҳукм қилинса, бу жуда инсоний ҳаракат бўлар эди, — дея у 145 киши қурбон бўлган Crocus City Hall’даги терактни мисол қилган.