Польша давлат компанияси Эронга дронлар учун эҳтиёт қисм сотганликда айбланмоқда
![Польша давлат компанияси Эронга дронлар учун эҳтиёт қисм сотганликда айбланмоқда Польша давлат компанияси Эронга дронлар учун эҳтиёт қисм сотганликда айбланмоқда](/photos/news/vSQONrqFawhRp61.jpeg)
Польша давлат компанияси Эрон жанговар учувчисиз учиш аппаратларида ишлатилган қисмларни сотганликда айбланмоқда. Бу ҳақда пайшанба куни Польшанинг Radio Zet хусусий радиостанцияси хабар берди. Ахборот манбалари номи айтилмаган, аммо прокуратура бу масалани 2022 йилдан бери текшириб келмоқда.
Қайд этилишича, Украинада кенг кўламли уруш бошланганидан буён Эрон Россияга минглаб Shahed-136 камикадзе дронларини етказиб берган. Улар Украина ҳаво мудофаасини йўқ қилиш ва фронт чизиғидан узоқда жойлашган инфратузилмага зарба бериш учун ишлатилган.
Польша прокуратураси Reuters агентлигига электрон почта орқали Польша икки томонлама маҳсулотларнинг "Тараққиёт ва технологиялар вазирининг қонуний рухсатисиз" экспорт қилинишини текширишаётганини тасдиқлаган. Бироқ Эрон тилга олинмаган.
Польша НАТО аъзоси бўлиб, аввалги миллатчи ҳукумат даврида ҳам, Дональд Тускнинг ҳозирги Европапараст маъмурияти даврида ҳам Украинанинг энг катта қўллаб-қувватловчиларидан бири бўлган.
Radio Zet маълумотларига кўра, Саноатни ривожлантириш агентлигига тегишли Польша компанияси Эрон дронларида кейинчалик қўлланилган ёқилғи насосларини сотган.
Радиостанциянинг таъкидлашича, WSK Poznan Эроннинг қишлоқ хўжалиги тракторлари ишлаб чиқарувчи Motorsazan компаниясига эҳтиёт қисмларни сотган. Аммо насослар Эроннинг ҳарбий учувчисиз учиш аппаратларига ўрнатилган ва кейинчалик Россия томонидан сотиб олинган.
Мазкур масала Миллий хавфсизлик агентлиги (ABW) томонидан текширилган ва бу ҳақда прокуратура хабар берган, дейилади хабарда.
Давом этаётган тергов доирасида компаниянинг ўша пайтдаги бош директори тегишли рухсатсиз стратегик маҳсулотларни сотишда айбланган ва 10 йилгача қамоқ жазосига ҳукм қилинган.