Исроилликлар намойишга чиқишди: улар ХАМАС билан сулҳ тузишни талаб қилишмоқда

Ғазо секторида олти кишининг жасади топилганидан кейин ўн минглаб одамлар Тел-Авив ва Қуддус кўчаларига чиқиб, ХАМАС билан гаровга олинганларни озод қилиш бўйича келишувга эришишни талаб қилишди. Бу ҳақда The Times of Israel хабар бермоқда.

Тел-Авивда ўн минглаб одамлар кўчаларга чиқиб, исроиллик гаровга олинганларни озод қилиш учун ХАМАС билан сулҳ тузишни талаб қилди. Нашрнинг қайд этишича, бу Фаластин анклавида 2023 йил 7 октябрда ҳарбий ҳаракатлар бошланганидан бери энг йирик норозилик намойиши бўлиши мумкин.

Қуддусда, хавфсизлик кабинетининг фавқулодда йиғилиши бўлиб ўтгани сабабли, минглаб одамлар Исроил парламенти олдида тўпланди. Намойишчиларнинг кўпчилиги йиғилишни бузишга уриниб, шовқин-сурон кўтариб, ҳуштак чалишди. Намойишчилар ҳукумат ишига халақит беришда давом этиш учун душанба куни қайтиб келишларини айтишди.

Исроилнинг аксарият касаба уюшмаларининг вакили бўлган Ҳистадрут миллий касаба уюшма маркази душанба куни бутун мамлакат бўйлаб оммавий иш ташлашга чақирди. Шу муносабат билан мамлакатдаги барча мактаблар, алоҳида эҳтиёжли болалар мактабларидан ташқари фақат соат 11:45 гача ишлайди. Барча болалар боғчалари ёпилди.

Бундан ташқари, иш ташлаш муносабати билан мамлакатнинг асосий аэропорти Бен Гурионда барча рейслар тўхтатилди. Аэропортнинг қачон очилиши номаълум.