Айрим россияликлар Мўғулистон ҳукуматини Путинни ХЖС ордери асосида ҳибсга олишга чақирди

Урушга қарши россияликлар Мўғулистон ҳукуматини Путинни ХЖС ордери асосида ҳибсга олишга чақирди.

Мўғулистон Адлия вазирлиги, Ички ишлар вазирлиги, Миллий полиция агентлиги ва ҳукуматига йўлланган петиция change.org сайтида эълон қилинди. У тўрт тилда - инглиз, рус, беларус ва мўғул тилларида ёзилган.

Ҳужжат муаллифларининг таъкидлашича, 2022 йил 24 февралда Владимир Путин Украинага қарши уруш бошлаган, бу уруш аллақачон 11 минг тинч аҳолини ўлдирган ва яна 21 мингга яқин киши жароҳат олган. Бундан ташқари, Россия армияси кўплаб ҳарбий жиноятларни содир этган, дейилади мурожаатномада.

Муаллифлар, шунингдек, сўнгги 10 йил ичида Россия расмийлари мухолифатни қаттиқ бостиргани, Борис Немтсов, Алексей Навалний ва бошқалар Путиннинг буйруғи билан ўлдирилганини қайд этади. Нашрнинг таъкидлашича, худди шундай ҳолат Беларусда ҳам кузатилмоқда.

Урушга қарши россияликлар Мўғулистон ҳукуматини Путин келиши билан ҳибсга олишга ёки мамлакатга ташрифини бекор қилишга чақирди. Ҳужжатни Владимир Кара-Мурза, Иля Пономарев, Борис Зимин, Олга Романова, Анастасия Буракова ва бошқа россиялик ижтимоий фаоллар имзолаган.