Беларус ШҲТга қабул қилинди

Шанхай ҳамкорлик ташкилотининг (ШҲТ) Остонадаги саммити Беларусни ассоциацияга қабул қилиш тўғрисидаги ҳужжатларни имзолаш билан бошланди, деб ёзади «ТАСС».

Саммит аввалида Қозоғистон президенти Қосим-Жомарт Тўқаев ҳужжатларни имзолашни таклиф қилган. Унинг сўзларига кўра, Беларус «қисқа вақт ичида ШҲТга аъзо бўлиш йўлидаги барча зарур тартиб-қоидаларни бажарди».

Шундай қилиб, мамлакат ташкилотнинг тўлиқ ҳуқуқли, ўнинчи аъзосига айланди. Ҳиндистон, Эрон, Қозоғистон, Хитой, Қирғизистон, Покистон, Россия, Тожикистон ва Ўзбекистон ҳам худди шундай мақомга эга.