Баҳодир Жалолов: "Рақибни биз танламадик"
Супероғир вазн тоифасидаги боксчимиз Баҳодир Жалолов 17 февраль кунги жанги ҳақида фикр билдирди.
"Саудия Арабистонида сўнгги кунларда кўплаб спорт турлари бўйича нуфузли спорт тадбирлари ташкил этилмоқда. Бу каби мусобақаларда иштирок этишнинг ўзи катта натижа.
17 февраль куни Тайсон Фьюри ва Александр Усик ўртасида ўтадиган жанг оқшомида менинг ҳам рингга кўтарилишим ҳақида хабар берилди ва биз бунга рози бўлдик. Ҳаттоки, рақибни ҳам ташкилотчилар топди, биз танламадик.
Мен ҳар қандай рақибга қарши жанг қилишга тайёрман ва унутмаслик керак, бу йил Олимпия ўйинлари ўтказилади. Ушбу мусобақагача бўлган ҳар бир жангим тўрт йилликнинг энг йирик спорт тадбирига муҳим тайёргарлик вазифасини ўтайди. Мазкур бокс оқшомида чиройли жанг ўтказиб, ғалаба қозониш учун рингга чиқаман", - деди Баҳодир Жалолов.
Эслатиб ўтамиз, Жалолов черногориялик Дилан Прашовичга қарши рингга чиқади.
