АҚШда мактабдаги отишмада ўсмир ҳалок бўлди

Мериленд штатининг Жоппа шаҳридаги мактабдаги отишмада 15 ёшли ўсмир ҳалок бўлди.

Бу ҳақда ABC телеканали шаҳар таркибига кирувчи Харфорд округи полициясига таяниб хабар берди.

Унинг сўзларига кўра, мактаб биносидаги ҳожатхоналардан бирида жанжал келиб чиққан, натижада бир ўқувчи иккинчисини ўқотар қурол билан оғир яралаган. Шундан сўнг у шоша-пиша таълим муассасасини тарк этган, бироқ бир неча дақиқадан сўнг уни яқин атрофда полиция ходимлари қўлга олишган.

Яраланган ўсмирга воқеа жойида биринчи тиббий ёрдам кўрсатилиб, кейин касалхонага ётқизилган. Кейинроқ округ шерифи унинг касалхонада вафот этганини эълон қилди, деб хабар берди телеканал.

Воқеа юзасидан суриштирув ишлари бошланган.