Ҳизбуллоҳнинг таҳдидли баёноти эълон қилинди

Ҳизбуллоҳ бош котиби ўринбосари Наим Қосим Бейрутда сўзлаган нутқида 100 минг исроилликни Ливан чегараси яқинидаги уйларига қайтаришга қаратилган кенг кўламли Исроил уруши «яна юз минглаб одамларнинг кўчирилишига олиб келишини» айтди.

Исроил 9-каналининг ёзишича, Ҳизбуллоҳ раҳбари ўринбосари шу тариқа яҳудий давлати мудофаа вазири Ёав Галантнинг Исроил шимолий чегараларида хавфсизликни тиклашга қарор қилгани ҳақидаги баёнотига жавоб берди.

«Биз урушга киришмоқчи эмасмиз, чунки бу ҳеч қандай фойда келтирмаслигига ишонамиз. Аммо, агар Исроил уруш бошласа, биз улар билан юзма-юз учрашамиз ва иккала томон ҳам катта йўқотишларга дучор бўлади», — дея огоҳлантирди Қосим.

11 сентябрь куни Исроил шимолида жойлашган Одед бригадасининг заҳирадаги аскарлари билан учрашувда Ёав Галант уларни Ливанда қуруқликдаги операцияга тайёрланишга чақирди.