O‘zbekiston va Italiya o‘rtasida talabalar hamda professor-o‘qituvchilar almashinuvi bo‘lishi mumkin
O‘zbekiston va Italiya o‘rtasida talabalar va o‘qituvchilar almashinuvi bo‘lishi mumkin, deb xabar bermoqda “Dunyo” axborot agentligi.
Ma’lum qilinishicha, 23-27 sentyabr kunlari universitetlar va tadqiqotlar vaziri Anna Mariya Bernini boshchiligidagi Italiya oliy ta’lim muassasalari rektorlari delegasiyasi amaliy tashrif bilan O‘zbekistonda bo‘ladi. O‘zbekistonning Rim shahridagi elchixonasi ma’lumotiga ko‘ra, tashrif davomida Toshkent shahrida 24 sentyabr kuni birinchi O‘zbekiston-Italiya ta’lim forumi o‘tkaziladi.
Tadbirda Italiyaning Turin politexnika, Venesiyaning Ka-Foskari, Bolonya, Piza, Bikokka Milan, Roma Tre, Tushsha va Siyena universitetlari kabi 20 dan ortiq yetakchi oliy o‘quv yurtlari, O‘zbekiston tomonidan esa 46 ta yetakchi oliy ta’lim muassasalari rektor va prorektorlari ishtirok etadi.
Forum doirasida ikki davlat universitetlari o‘rtasida bir qator qo‘shma ta’lim dasturlarini amalga oshirishga oid hamkorlik shartnomalari imzolanishi rejalashtirilgan. O‘zbekiston-Italiya ta’lim forumi kun tartibidan talabalar va professor-o‘qituvchilar almashinuvi, pedagoglar malakasini oshirish, universitetlararo hamkorlik, ilmiy tadqiqot loyihalarini qo‘llab-quvvatlash va sohaning boshqa muhim masalalari muhokamasi o‘rin olgan.
Italiya tomoniga ko‘ra, universitetlar va tadqiqotlar vaziri Anna Mariya Bernini ushbu tashrif davomida aniq natijalarga erishish va mazkur yo‘nalishda ikki davlat oliy ta’lim muassasalari o‘rtasidagi aloqalarni yanada rivojlantirishni asosiy maqsad sifatida belgilamoqda.
