Ishtixonda Nexia 3 yo‘l chetida to‘xtab turgan Isuzu’ga borib urildi. Qurbonlar bor

Samarqand viloyati Ishtixon tumanida Nexia 3 va Isuzu ishtirokida yo‘l-transport hodisasi sodir bo‘ldi. Bu haqda viloyat YHXB xabar qildi.

Qayd etilishicha, 2024 yil 15 iyun kuni soat 12:10 larda Ishtixon tumani «Qirqyigit» mahallasi hududidan o‘tuvchi M-37 Samarqand-Buxoro-Turkmanboshi avtomobil yo‘lining 61 kilometrida Nexia 3 yo‘lning o‘ng tomon chetki qismida to‘xtab turgan Isuzu yuk avtomashinasining orqa tomoniga kelib urilgan.

Oqibatda Nexia-3 old o‘rindig‘ida bo‘lgan yo‘lovchisi olgan tan jarohati tufayli voqea joyida, avtomobilning orqa o‘rindig‘ida bo‘lgan yo‘lovchisi esa tuman markaziy shifoxonasining jonlantirish bo‘limida vafot etgan.

Holat yuzasidan Samarqand viloyati IIB huzuridagi tergov bo‘limi tomonidan jinoyat ishi qo‘zg‘atilib, dastlabki surishtiruv ishlari olib borilmoqda.