HAMAS G‘azo sektorida sulh tuzish uchun yangi taklif kiritganidan keyin Isroil guruh bilan muzokaralarni davom ettirishga rozi bo‘ldi —Reuters
Isroil razvedka xizmati Mossadning rahbari Devid Barnea kelishuv tafsilotlarini, shu jumladan, HAMAS asirligidagi garovga olinganlarni ozod qilishni muhokama qilish uchun Qatarga bordi, deb aniqlik kiritdi The Times of Israel.
"Kelishuvga erishish uchun imkoniyat bor. HAMAS tomonidan ilgari surilgan taklif juda muhim jihatni o‘z ichiga oladi", — dedi Isroil muzokaralar guruhidagi manba Reuters'ga.
Isroil HAMASdan sulh kelishuvi bo‘yicha navbatdagi taklifni 3 iyul kuni olgan. Bu may oyi oxirida prezident Jo Bayden tomonidan taqdim etilgan AQSh rejasiga javob bo‘ldi. Taklif uch bosqichdan iborat. Birinchisi garovga olingan iroilliklar va falastinlik mahbuslarni almashishni, shuningdek, qisqa muddatli sulhni nazarda tutadi.
Falastin rasmiysi Reuters'ga HAMAS ba’zi nuqtalarda, agar Isroil buni ma’qullasa, qisman kelishuvga erishishga imkon beradigan "moslashuvchanlik namoyish etganini" aytgan.
