AQSh harbiylari husiylarning beshta dronini yo‘q qildi

Zarbalar yamanlik isyonchilarning Qizil dengizdagi kemalarga uyushtirgan qator hujumlariga so‘nggi javob bo‘ldi. Seshanba kuni AQSh armiyasi AQSh va koalisiya kuchlari Qizil dengizda beshta husiy dronini urib tushirganini ma’lum qildi, deb xabar beradi Amerika ovozi.

AQSh Markaziy qo‘mondonligi ma’lumotlariga ko‘ra, dronlar Yamandagi husiylar nazorati ostidagi hududlardan uchirilgan.

Qo‘mondonlik bayonotida aytilishicha, dronlar “hududdagi savdo kemalari, shuningdek, AQSh harbiy-dengiz kuchlari va koalisiya kemalari uchun to‘g‘ridan-to‘g‘ri xavf tug‘diradi”.

Bu Qizil dengizdagi kemalarga bir necha oydan beri davom etayotgan husiy hujumlariga qarshi yana bir chora edi.

Husiylar G‘azo sektoridagi urush paytida falastinliklar bilan hamkorlik qilayotganini aytadi.

Hujumlar ko‘plab yuk tashish kompaniyalarini Qizil dengiz yo‘laklaridan uzoqlashtirib, Afrika bo‘ylab uzoqroq va qimmatroq yo‘nalishni tanlashga majbur qildi.

Dengiz xavfsizligi firmalariga ko‘ra, husiylar seshanba kuni kechqurun Yamanning Xodeyda portidan 110 kilometr g‘arbda yangi hujum uyushtirgan.

Britaniyaning Dengiz savdogarlari operasiyalari markazi kemadan bir necha kilometr uzoqlikda raketa portlashi haqida xabarlar olganini, u zarar ko‘rmagani va harakatni keyingi portgacha davom etganini aytdi.

Britaniyaning Ambrey xavfsizlik firmasining bildirishicha, kema Marshall orollari bayrog‘i ostida suzuvchi yunon kompaniyasiga tegishli yuk kemasi bo‘lib ko‘rinadi.