"Қурилиш — UzBuild 2024" кўргазмасида 18 мамлакатдан 450 дан ортиқ компания ва брендлар иштирок этади
Пойтахтимиз мезбонлик қиладиган «Қурилиш – UzBuild 2024» халқаро кўргазмаси олдидан ОАВ вакиллари учун ПРEСС-ЛАНЧ ташкил этилди. Унда мутасадди ташкилот ва хорижий компания вакиллари, журналистлар ва ташкилотчилар иштирок этишди.
Дастлаб, кўргазма фаолияти, унинг тарихи, иштирокчилар ва тадбирлар ҳақида тўлиқ маълумотлар берилди. Шу билан бирга ташкилий масалалар ҳақида ҳам сўз борди.
Таъкидланишича, 27 февралдан 1 мартга қадар Пойтахтимиздаги «Ўзэкспомарказ»да 25-Юбилей Халқаро «Қурилиш – UzBuild 2024» кўргазмаси ўз экспозициясини намойиш этади. – Тадбир Итеcа Эхҳибитионс халқаро кўргазма компанияси томонидан ташкил этилмоқда.
Жорий йилги UzBuild 2024 кўргазмасида 18 мамлакатдан 450 дан ортиқ компания ва брендлар иштирок этмоқда. Беларус Республикаси, Германия, Хитой, Туркия миллий павилонлари тақдим этилган, Россия Федерациясининг бир қатор ҳудудлари жамоавий тарзда иштирок этмоқда. Озарбайжон, Беларус Республикаси, Хитой, БАА нуфузли делегацияларининг ташрифи кутилмоқда. Кўргазма ўз экспозициясини «Ўзекспомарказ» Миллий кўргазмалар компаниясининг барча павилонларида ва очиқ майдонида тақдим этади.
Кўргазманинг ихтисослаштирилган бўлими «Қурилиш техникаси ва технологиялари – Build Tech» - қурилиш техникаси, йўл қурилиши ускуналари, қурилиш материаллари ишлаб чиқариш ва кўплаб бошқа маҳсулотларнинг кенг танловини намойиш этади.
Кўргазмада шунингдек, 5-Халқаро қурилиш саноати анжумани – ICCI 2024 бўлиб ўтади. Анжуманда етакчи компаниялар, молия институтлари вакиллари ва йирик халқаро экспертлар иштирок этади. Тадбир нафақат хорижий тажриба билан танишиш, балки қурилиш соҳасидаги маҳаллий лойиҳаларни потенциал инвесторлар ва ҳамкорлар эътиборига етказиш учун самарали имкониятдир.
ОАВ вакиллари учун ташкил этилган тадбирда инновацион, энергия тежамкор, янги турдаги қурилиш материаллари ҳам намойиш этилиши ҳақида алоҳида тўхталиб ўтилди.
Маълумки, Давлатимиз раҳбарининг эътибори ва ислоҳотлари натижасида қурилиш материаллари саноати мамлакат иқтисодиётининг асосий драйверларидан бирига айланди. Ишлаб чиқариш, инвестиция ва экспорт кўрсаткичлари йил сайин ортиб бормоқда. Янги турдаги инновацион, энергия тежамкор қурилиш материаллари ишлаб чиқаришга алоҳида эътибор қаратилган.
Рақамларга эътибор қаратадиган бўлсак, 2016 йилда соҳада 8,1 мингта корхона фаолият кўрсатган бўлса, 2024 йилга келиб ушбу кўрсаткич 12,2 мингтага етди. Ҳозирда Республикада 185 турдаги қурилиш материаллари ишлаб чиқарилади. 2023 йилда 15,5 млн тонна - цемент, 38 млн кв метр – қурилиш ойнаси, 42 млн кв метр – керамик плитка, 87 млн кв. метр – гипсокартон, 2,8 млн ўрам – обой, 200 минг тонна – табиий пардозбоп тошлар тайёрланди. Шунингдек, ўтган йилда янги турдаги, энергия тежамкор қурилиш материалларидан 900 минг метр куб газобетон, 5,5 млн кв. метр линолеум, 38 тонна смесител, 75 минг тонна иссиқлик сақловчи плиталар ишлаб чиқарилди.
Шуни алоҳида таъкидлаш керакки, ўтган 5 йил давомида тармоқда инвестиция жалб қилиш, хусусан, хорижий инвестицияларни йўналиштириш 2,1 баробарга ортди. Асосан, мамлакатимиздаги қурилиш материаллари саноатига Хитой, Россия, Туркия, Эрон, Қозоғистон каби давлатлардан инвесторлар қизиқиши ортмоқда. Биргина 2023 йилнинг ўзида 2,0 млрд долларлик 420 та инвестиция лойиҳалари амалга оширилди. Натижада, янги қувватлар яратилди, импорт ўрнини босувчи, янги турдаги қурилиш материалларини ишлаб чиқариш ўзлаштирилди. Энг муҳими 14200 та иш ўрни яратилди. Қурилиш материаллари саноатида инвестиция лойиҳаларини амалга оширишда Тошкент, Самарқанд, Жиззах, Навоий, Бухоро вилоятлари етакчи саналади.
