Ғазолик 50 нафар бола даволаниш учун Колумбияга олиб келинади
Исроилнинг Ғазо секторида уюштирган ҳужумлари натижасида яраланган 50 нафар бола даволаш учун Колумбияга олиб келинади. Бу ҳақда журналистларга Колумбия ташқи ишлар вазири Луис Гилберто Мурилло маълум қилди, дейди “Анадолу”.
Вазирнинг қайд этишича, мамлакатга олиб келинган фаластинлик болалар ҳарбий госпиталда даволанади. Унга кўра, болалар Миср орқали мамлакатга олиб келинади.
“Мақсад Колумбияга Ғазо секторидаги ҳужумлар натижасида яраланган ёки ногирон бўлган 35 дан 50 гача болаларни олиб келиш. Биз уларни ҳамроҳлари билан бу ерда 6 ойгача жойлаштирмоқчимиз. Кейин улар яна Мисрга етказилади”, — деди Колумбия ТИВ раҳбари.
Мурилло, бу борада Миср ва Иордания ташқи ишлар вазирларидан керакли ёрдамни олганини қайд этди.
“Биз уларнинг (болалар) тикланишига ҳисса қўшадиган протез ва бошқа жиҳозларни тайёрлаяпмиз. Ҳозирча сизга аниқ келиш санасини айта олмайман, лекин биз жиддий ютуқларга эришдик. Президент Густаво Петро аллақачон керакли буйруқларни берган”, деди у.
Колумбия бошқа мамлакатларни Ғазо секторидаги болаларни даволашга ҳисса қўшишга ундаш учун барча саъй-ҳаракатларини қилмоқда, дея қўшимча қилди Мурилло.
