АҚШнинг Ироқдаги иши тугади: америкаликлар Курдистонга кўчиб ўтади
Қўшма Штатлар Ироқ ҳукумати билан "ҳарбий миссия"сини келаси йил бошида тугатиш тўғрисида келишувга эришганини эълон қилди.
«Америка Овози»нинг хабар беришича, Америка қўшинлари мамлакатда йигирма йиллик ҳарбий мавжудлик давомида эгаллаб олган базаларини тарк этади.
Аммо президент Байден маъмурияти Ироқда хизмат қилаётган 2500 га яқин америкалик аскардан қанчаси қолиши ҳақида батафсил маълумот беришдан ёки бу мамлакатдан бутунлай чиқиб кетишни англатишини тан олишдан бош тортди.
Пентагон матбуот котиби ўринбосари Сабрина Сингх журналистларга батафсил маълумот бермасдан, “Бизнинг мамлакатдаги (Ироқ) мавжудлигимиз ўзгаради, дейиш адолатли, деб ўйлайманʼ, деди.
Жума куни журналистларга брифинг берган АҚШ расмийлари келишув қўшинларни икки босқичли олиб чиқиб кетишга олиб келишини, биринчиси шу ой бошланганини айтди. 2025 йилнинг сентябригача давом этадиган бу босқичда кучлар бир қанча эски базаларни тарк этади.
Ассоcиатед Пресс агентлигига исмини ошкор қилмаслик шарти билан гапирган Ироқ ҳукумати расмийларига кўра, ноябрь ойидаги сайловлардан сўнг АҚШ қўшинлари Ироқ ғарбидаги Айн ал-Асад ҳаво базаси ва Бағдод халқаро аэропортини тарк этишни бошлайди. Бу кучлар Эрбилдаги (Ироқ Курдистонидаги) Ҳарир базасига ўтади.
Иккинчи босқичда АҚШ 2026 йилгача қандайдир шаклда фаолиятини давом эттиради.
Ироқ расмийлари, Курдистон минтақавий ҳукумати уларнинг қолишини истагани учун 2026 йилдан кейин ҳам АҚШнинг баъзи кучлари Ҳарир базасида қолиши мумкинлигини тахмин қилишди.
