“Real” qiziqish bildirayotgan “Bavariya” futbolchisiga ultimatum qo‘yildi

“Bavariya”ning kanadalik himoyachisi Alfonso Devisning vakili Nedal Xuose futbolchining kelajagi haqida gapirdi. Eslatib o‘tamiz, avvalroq Devis “Real” e’tiborini tortgani haqida xabar berilgan edi.

“Bavariya bizga ultimatum qo‘yayotgani adolatsizlik. Futbolchining kelajagi to‘g‘risida mavsum so‘ngida qaror qilamiz. Hozir Alfonsoga tazyiq o‘tkazilayotgani adolatdan emas. Bir yil oldin biz kelishuvga yaqin edik. Keyin klubning butun rahbariyati o‘zgardi. Biz yetti oy davomida hech narsa eshitmadik. Vaholangki, bu vaqt ichida men o‘zim klub bilan bog‘lanishga harakat qildim.

Endi bizga ultimatum qo‘yildi va biz ikki hafta ichida javobimizni aytishimiz kerak ekan. Bu — adolatsizlik. Keyingi shartnoma Alfonsoning faoliyatida juda muhim bo‘ladi va biz kelasi mavsumda murabbiy kim bo‘lishini va jamoa qanday ko‘rinishda bo‘lishini bilmay turib bir qarorga kelishimiz kerak. Shuning uchun bizning oldimizga qo‘yilgan ultimatumni adolatsiz deb hisoblaymiz”, — deya Xuosening so‘zlarini keltiradi Insayder Fabrisio Romano X (sobiq Twitter) ijtimoiy tarmog‘ida.

Alfonso Devis 2000 yilda tug‘ilgan va hozirgi kundagi eng kuchli himoyachilardan biri hisoblanadi.