Olimpiadadagi janjal: Janubiy Koreya Parij Olimpiadasida Shimoliy Koreya sifatida taqdim etildi

Olimpiada tashkilotchilari Parijdagi ochilish marosimida janubiy koreyalik sportchilar yanglishib Shimoliy Koreya vakillari sifatida taqdim etilgani uchun «chuqur uzr» so‘rashdi.

Shimoliy Koreya Rio-2016 Olimpiadasidan keyin ilk bor o‘zining 16 nafar sportchisini o‘yinlarga yubordi.

Janubiy Koreya sport vazirligi «Fransiya ustidan hukumat darajasida jiddiy shikoyat» yuborishni rejalashtirayotganini aytdi.

Bayonotda, shuningdek, sport vazirining ikkinchi o‘rinbosari, og‘ir atletika bo‘yicha 2008 yilgi Olimpiya chempioni Jang Mi-ran Olimpiya qo‘mitasi prezidenti Tomas Bax bilan uchrashishni talab qilgani aytilgan.

Xalqaro olimpiya qo‘mitasi (XOQ) o‘zining Koreyadagi rasmiy X akkauntida uzr so‘radi: «Ochilish marosimida Janubiy Koreya delegasiyasi taqdimotida yo‘l qo‘yilgan xatolik uchun chuqur uzr so‘raymiz».

Rasmiy ravishda Koreya Respublikasi deb nomlanuvchi Janubiy Koreyaning bu yilgi olimpiya terma jamoasiga 21 sport turi bo‘yicha 143 nafar sportchi kiritilgan.

Hayajonlangan ekipaj bayroqlarni hilpiratib, Sena daryosi bo‘ylab suzib ketayotganda, frantsuz va ingliz diktorlari ularni «Koreya Xalq Demokratik Respublikasi» - Shimoliy Koreyaning rasmiy nomi deb tanishtirdilar.
Shimoliy Koreya delegasiyasi suzib o‘tganda ham xuddi shunday nom ishlatilgan.