BMT: "Suriyada 12,4 million kishi oziq-ovqat taqchilligiga duch kelmoqda"
BMTning 13 fevral kuni bergan ma’lumotlairga ko‘ra, anchadan beri urushlar davom etib kelayotgan Suriyada ayni paytda 12.4 million kishi yetarlicha oziq-ovqat topishda qiyinchiliklarga duch kelmoqda. BMT ushbu holatni “tashvishli” deb ta’riflagan.
“Bu raqam hozirda Suriya aholisining 60 foizi oziq-ovqat masalasida xavfsiz emasligini anglatadi” deya xabar berdi BMT tarkibidagi Jahon oziq-ovqat dasturi 2020 yil oxiridagi natijalariga asoslanib.
Suriyada o‘tgan yilning may oyida 9.3 million kishi oziq-ovqat yetishmasligidan aziyat chekardi. Bir yilda bunday odamlar soni 3 milliontadan ko‘proqqa oshgan.
«Hozirda suriyaliklar har qachongidan ham ko‘proq ochlik, qashshoqlik va oziq-ovqat xavfsizligi muammosiga duch kelishmoqda. Ko‘pchilik oilalarning hayot uchun zarur bo‘lgan asosiy ozuqaga ega emasligi tashvishli holat» deydi, Jahon oziq-ovqat dasturi vakili Jessika Louson.
O‘n yildan beri davom etayotgan urush Suriya iqtisodini vayron qildi va inflasiya darajasi keskin oshib ketdi. 2021 yilning boshiga kelib Suriyada oziq-ovqat narxi urush boshlanishidan oldingi narxdan 33 baravarga oshgan.
Suriyada 2011 yilda boshlangan urush hozirgacha 387 ming kishining yostig‘ini quritdi va millionlab tinch aholini o‘z uylarini tark etishlariga majbur qildi.