Яман ҳусийлари АҚШ, Буюк Британия ва Исроил юк кемаларига зарбалар берди
Яман ҳусийлари 1 июль куни АҚШ, Буюк Британия ва Исроилга алоқадор тўртта кемага зарба берган. Бу ҳақда “Ансоруллоҳ” ҳаракати тарқатган хабарга асосланиб, Al Arabiya нашри хабар берди.
Манбада келтирилишича, душанба куни ҳусийлар Қизил денгиз, Арабистон денгизи ҳамда Ўрта Ер денгизларида махсус операция ташкил этган. Ҳинд океанида ҳам ҳусийлар ҳаракати кузатилган. Ушбу операцияларда аниқланган тўртта кемага жиддий шикаст етказилган.
Операциянинг биринчи босқичида Арабистон денгизида Исроилнинг МСC Унифиc кемаси нишонга олинган. Бу маълумотни “Ансоруллоҳ” матбуот котиби Яҳё Сария тасдиқлаган.
Ҳусийлар ,шунингдек, АҚШнинг “Делоних” нефть танкерига ҳам ҳужум қилган. Ҳужум Қизил денгизда амалга оширган ва танкер қисмларига жиддий шикаст етказилган.
“Ансоруллоҳ”нинг учинчи операциясида Буюк Британиянинг Ҳинд океанида сузиб юрган Анвил Point десант кемаси нишонга олинган. Кема унга яқинлашаётган ҳусийларга огоҳлантириш юборган. Шунга қарамай гуруҳ бир қанча фаол ҳужумлар ташкил этган.
Ҳусийларнинг ҳал қилувчи ҳужуми Ўрта Ер денгизида рўй берган. Ташкилот воизи Яҳё Сария “Бахтли денгизчи” деб аталган номаълум кема ракеталар билан урилганини хабар қилган..
Ҳусийларнинг Ўрта Ер денгизида ҳужум амалга ошириши Ғарб томонидан жиддий сигнал сифатида қабул қилинган. АҚШ Марказий қўмондонлигининг Қизил денгиздаги контингенти денгиз назорат тадбирларини кучайтирган.
