Хитой банклари «Россия изига» эга юандан воз кечяпти
![Хитой банклари «Россия изига» эга юандан воз кечяпти Хитой банклари «Россия изига» эга юандан воз кечяпти](/photos/news/WLFeAPz3Vd99AxU.jpeg)
Хитойнинг баъзи банклари юанни яширинча «тоза» ва «ифлос»га бўлишни бошладилар. Улар иккинчисини Россия компаниялари билан операцияларда ишлатиладиган валюта деб ҳисоблайди. Бу ҳақда 26 июл, жума куни бизнес вакилларига таяниб, «Ведомости» газетаси хабар берди.
Манбалардан бирига кўра, Хитой банки АҚШ санкцияларига дучор бўлган Москва биржасида сотиб олинган юанни қабул қилишни истамаган ҳолат бўлган. Яна бир суҳбатдош Хитой банклари «рус изига эга бўлган ҳар қандай юан билан ишлашни истамаслигини, «соф» юанни афзал кўришини» таъкидлаб, янада аниқроқ гапирди. Хитой банклари, агар валюта Россия компаниялари ёки жисмоний шахслари билан операцияларда ишлатилган деб гумон қилса, юан билан муомала қилишдан бош тортиши мумкин, деди бошқа манба. Шу билан бирга, банкирлар юан қаердан сотиб олинганини аниқ била олмайди, бироқ «Ведомости» суҳбатдошлари таъкидлаганидек, «улар Россия банкларидан келадиган ёки ҳужжатларга кўра Россия билан боғланган валютадан бош тортади».
Нашр суҳбатлашган экспертларга кўра, Хитой бизнеси Россия билан битимлар учун АҚШ томонидан санкциялар қўлланишидан хавотирда. Бундан ташқари, Хитойнинг АҚШ ва ЕИ билан ташқи савдоси ҳажми Пекин Москва билан экспорт-импорт операцияларидан оладиган пулдан бир неча баравар кўп.
2023 йил охирида Россия бизнеси учун Хитой банклари билан долларда ҳисоб-китоб қилишга алоқадор қийинчиликлар бошланган. Бу АҚШ президенти Жо Байден учинчи давлатлар банклари Россия ҳарбий-саноат комплексига ёрдам берса, уларга қарши санкциялар жорий этилишини маълум қилганидан кейин юз берди.