Херсон вилоятининг Россия назорати остидаги қисми ўққа тутилди
Херсон вилоятининг Россия назорати остидаги қисмида дўконга уюштирилган ҳужум натижасида 22 киши ҳалок бўлди, 15 киши жароҳатланди. Украин қўшинлари ҳужумда француз авиабомбалари ва Американинг HIMARS снарядларидан фойдаланди.
Россиянинг назорат остидаги қисмидаги Херсон вилоятининг Садовое қишлоғига уюштирилган ҳужум натижасида 22 киши ҳалок бўлди. Бу ҳақда Херсон вилояти губернатори Владимир Сальдо маълум қилди.
“Голопристанский туманидаги Садовое қишлоғига душман жангариларининг ваҳшиёна ҳужуми натижасида ҳалок бўлганлар сони 22 кишига етди. Шу билан бирга, 15 киши жароҳат олди, улардан беш нафарининг аҳволи оғир”, — деб ёзди Сальдо ўзининг Телеграм каналида.
Сальдонинг таъкидлашича, зарба француз авиабомбаси ва Америкада ишлаб чиқарилган HIMARS снарядлари ёрдамида амалга оширилган.
Айни пайтда, "Луганск халқ республикаси" расмийлари Луганск шаҳрини ўққа тутишда олти киши ҳалок бўлганини маълум қилди. Шаҳардаги ракета зарбасидан кейин турар-жой биносига кириш йўлаги қулаб тушган. Вилоят ҳокимиятининг сўнгги маълумотларига кўра, 60 киши жабрланган, улардан тўрт нафари болалар.
“Луганскка кечаги ракета ҳужуми содир бўлган жойда иш тун бўйи давом этди. Қутқарувчилар вайроналар остидан яна икки кишининг жасадини олиб чиқишди. Соат 8:00 ҳолатига кўра, тинч шаҳарни ваҳшийларча ўққа тутиши натижасида 60 киши жабрланган. Қутқарув операцияси давом этмоқда”, — деб ёзди минтақанинг «раҳбари» Леонид Пасечник ўзининг Телеграм каналида.
У аввалроқ Луганскнинг ўққа тутилиши натижасида ўттиз учта кўп қаватли уй, иккита мактаб, учта болалар боғчаси ва бир коллеж зарар кўргани ҳақида хабар берган эди.
Аввалроқ Россия Мудофаа вазирлиги Луганск шаҳрининг турар-жойлари АҚШда ишлаб чиқарилган бешта АТАСМS ракетаси билан «мақсадли» зарба берилгани ҳақида хабар берган эди.
“Американинг тўртта ракетаси Россиянинг ҳаво мудофаа тизимлари томонидан уриб туширилди. Битта ракета иккита турар-жой биносига тегди. Натижада, дастлабки маълумотларга кўра, 20 дан ортиқ тинч аҳоли, жумладан, болалар жароҳатланган”, — дейилади хабарда.
Ўз навбатида, Россия ТИВ расмий вакили Мария Захарова Луганск ва Херсон вилоятига қилинган ракета ҳужумларини қоралади.
“Бутун дунё ҳамжамияти булар олдиндан режалаштирилган ва пухталик билан тайёрланган қўрқитиш террорчилик ҳаракатлари эканини тушуниши керак. НАТОнинг қўл ёзуви аниқ. Аввал айтиб ўтганимиздек, узоқ масофали ракеталарнинг, жумладан, АТАСМS парвоз миссиялари америкалик, британиялик ва бошқа ғарб мутахассисларининг бевосита иштирокида шакллантирилаётганини яхши биламиз”, — деди дипломат.
Захарованинг таъкидлашича, ҳужумларда иштирок этганлар муқаррар, муносиб жазога тортилишига шубҳа йўқ"
Украинанинг Донецк, Луганск, Запороже ва Херсон вилоятлари Россия президенти Владимир Путин томонидан 2022 йил 30 сентябрда имзоланган фармон билан ноқонуний равишда аннекция қилинган эди.
