«Вазият ҳалокатли»: Франция Нетаняхуга мурожаат қилмоқда
Исроил бош вазири Бинямин Нетаняху ҳукумати Ғазо сектори жанубидаги жангларни тўхтатиб, музокаралар йўлига қайтиши керак, дейди Франция ТИВ.
«Бу гаровга олинганларни зудлик билан озод қилиш ва доимий сулҳга эришишнинг ягона мумкин бўлган йўлидир», — дея департамент сўзларини келтиради Deutsche Welle.
Париж минтақа аҳолисига таҳдид солаётган «ҳалокатли вазият» ҳақида огоҳлантирмоқда. Франция Ташқи ишлар вазирлиги Исроил ҳукуматини тинч аҳолига гуманитар ёрдам етказиб бериш учун Рафаҳ ўтиш жойини қайта очишга ва «аҳолининг энг заиф қатламлари Ғазо секторини тарк этиши»га чақиради.
Исроил Мудофаа кучлари аввалроқ Рафаҳга танклар олиб келиб, инсонпарварлик нуқтаи назаридан муҳим бўлган Рафаҳ назорат-ўтказиш пунктини назоратга олган эди. Бу воқеадан кейин Қўшма Штатлар Исроилга қурол етказиб беришни тўхтатиш билан таҳдид қилганди.
