Туркиянинг кашф қилинишини кутаётган яширин хазиналари
Туркиянинг ҳар бир бурчагида қадимий тарих, табиий гўзаллик ва маданий бойликнинг ўзига хос уйғунлиги уфуриб туради ва кашф этилишини кутаётган улкан яширин хазиналар мавжуд. Бурдурнинг ям-яшил тепаликларидаги Сагалассоснинг қадимий харобаларидан тортиб Туркиянинг ўрта-ғарбий қисмидаги фригияликларнинг мистик меросигача бўлган жойлар кашфиёт ва ҳайратга тўла унутилмас тажрибаларга бойдир.
Фригия водийси: Кашф қилинмаган Онадўли тупроқлари
2024 йилги Париж Олимпиадаси маскотига ўзларининг рамзий Фригия қалпоқлари билан илҳом берган Фригияликлар Онадўлидаги энг қадимги цивилизациялардан биридир. Фригия водийси эса улкан ҳудуд бўлиб, Эскишеҳир, Кутаҳя, Афён ва Анқара вилоятларида ушбу маданият меросининг излари мавжуд. Туркиядаги энг узун юриш йўлларидан бири бўлган Фриг йўли билан Фригияликларнинг тарихий ватанларида қолган изларини кузатиб бориш мумкин. Фригия йўлини бошлаш учун учта муқобил ҳудуд бор - Гордион, Сейдилер ва Ениже фермаси. ЮНEСКОнинг Туркиядаги энг сўнгги мерос объектларидан бири бўлган Гордион Фригиянинг сиёсий ва маданий пойтахти сифатида танилган. Бу, шунингдек, Фригия қалпоғи ўйилган тасвирда пайдо бўлган биринчи жой. Энг тарихий масканлари орасида ўзининг ажойиб “пери бажалари” (улкан қоя тошлар) билан машҳур Сейдилер ва Аязида Фригия аҳоли пунктлари, Фригия қоя қабрлари ва ёдгорликлари жойлашган Гўйнуш водийси бор. Кутаҳядаги Ениже фермасида қоятошдан ясалган Деликтош ва Пентесер қалъалари тарихсеварларнинг энг севимли масканига айланди. Қаердан бошланишидан қатъий назар, йўллар Фригияликларнинг энг муҳим аҳоли пунктларидан бири бўлган Эскишеҳирдаги Язиликаяда бирлашади.
Аенеас: Кашф қилиш учун янги маданий йўналиш
Европа Кенгаши томонидан рўйхатга олинган биринчи ва ягона маданий йўналиш бўлган Аенеас йўли Туркиянинг ўзига хос тажрибаларидан биридир. Афсонавий Аенеас ҳақидаги ҳикояни жонлантирадиган ушбу археологик йўл Туркиянинг шимоли-ғарбий Эгей қирғоғидан бошланиб, Европа ва Ўрта ер денгизининг бешта давлатини қамраб олади ҳамда Италиянинг Латиум шаҳрида тугайди. Афсонага кўра, Аенеас Троя урушидан кейин Троядан қочиб, янги Троя қуриш учун саёҳатга отланган. Унинг кўп жойларни босиб ўтган саёҳати Италияда Рим цивилизациясининг пойдеворини қўйиш билан якунланади. Аенеас йўналиши турли хил қишлоқ ландшафтлари, табиий ҳудудлар ва археологик объектларни бирлаштиради. Маршрут Чаноққалъанинг Қадимги Троя шаҳридан бошланади ва Аенеас ўз кемаларини қурган Баликесирдаги Антандрос Қадимги шаҳрида давом этади.
Сагалассос: Яширин қадимий мўъжиза
Инсоният тарихидаги энг қадимий ўлкалардан бири бўлган Онадўли улкан археологик ёдгорликларга эга. Гарчи Бурдурда Ғарбий Онадўли минтақасидаги бу археологик ёдгорликларнинг баъзилари жойлашган бўлса-да, улар нисбатан кам ўрганилган. Шаҳарнинг энг муҳим тарихий хазиналаридан бири бу Сагалассос қадимий шаҳри. Агласун туманида жойлашган Сагалассос 9000 кишини сиғдира оладиган дунёдаги энг баланд театрга эга қадимий шаҳар сифатида ажралиб туради. Рим императорлик даврида Писидия минтақасининг энг муҳим шаҳарларидан бири бўлган ушбу шаҳар 2009 йилда ЮНEСКОнинг Бутунжаҳон мероси рўйхатига киритилган. Шаҳарнинг энг ҳайратланарли иншоотлари орасида 2000 йилдан бери оқаётган ажойиб Антонин фаввораси бор. Бурдурнинг яна бир қадимий шаҳри Қибйра ҳам қадимий фаввора жойлашган иккинчи жойдир.
