Собиқ Совет Иттифоқидан келган ноқонуний муҳожирларни АҚШдан депортация қилиш буюрилди
АҚШнинг Калифорния штати чегарачилари собиқ СССРнинг бир қанча давлатларидан келган ноқонуний муҳожирларни зудлик билан депортация қилиш бўйича буйруқ олди. Гап Грузия, Молдова, Қирғизистон, Россия, Тожикистон ва Ўзбекистон ҳақида бормоқда. Бу ҳақда New York Post газетаси ички ҳужжатга таяниб хабар бермоқда.
Ҳужжатда айтилишича, чегарани ноқонуний кесиб ўтган бошқалар АҚШда суд муддати билан озод қилиниши мумкин, аммо улар бошпана сўраб мурожаат қила олмайди. Бу ҳақда NYP'га чегара хизматидаги манба маълум қилган.
Божхона ва чегараларни ҳимоя қилиш хизмати Fox News телеканалига буйруқ фақат Сан-Диего секторига тегишли эканлигини тасдиқлади, бу ҳозирда ноқонуний миграция учун энг гавжум ҳудуд ҳисобланади.
Ушбу кўрсатмалар АҚШ президенти Жо Байденнинг ноқонуний иммигрантларнинг штатлардан бошпана сўрашини тақиқловчи фармони фонида берилган. Ҳужжатга кўра, улар ўз мамлакатларига тезкорлик билан депортация қилинади.
