Россия 60 минг аскаридан айрилгани маълум бўлди
Россия армияси Украинага кенг кўламли босқин уюштирганидан буён 60 минг аскаридан айрилган, дейилади “Медиазона” ва “BBC рус хизмати»нинг очиқ манбалар асосида волонтёрлар иштирокида олиб бораётган тадқиқотида.
26 июл ҳолатига Украинадаги урушда ҳалок бўлган 61 минг 9 нафар россиялик ҳарбийларнинг номига аниқлик киритилган. Уларнинг қарийб ярми (48 фоизи) урушгача армия билан боғлиқ жойи бўлмаган. 28 фоиз ҳалок бўлган аскарларнинг у ёки бу қўшинларга тегишлилигини аниқлашнинг имкони бўлмаган, чунки уларнинг некрологларига фуқаролик кийимида тушган суратлари илова қилинган.
Жанговар йўқотишларнинг 70 фоизи уруш бошланганидан сўнг армияга жалб қилинганлар билан боғлиқ. Июл ойининг охирларига келиб, энг кўп ҳалок бўлганлар сони Бошқирдистон Республикасига тегишли бўлиб турибди – 2300 киши.
Аниқлаштирилган ҳалок бўлган аскарларнинг 12 фоизи – ҳарбий сафарбарлик натижасида чақирилганлар (7663 киши), 15 фоизи кўнгиллилар (9532 киши) ва 12 мингдан ортиқ ҳалок бўлганлар собиқ маҳбуслардир. Босқин уюштирилганидан буён Россия Украинада 3725 нафар офицердан ажралган. Уларнинг 444 нафари подполковник ва ундан юқори ҳарбий рутбага эга.
Шу пайтгача урушда ҳаво-десант қўшинларининг 2734 нафар, денгиз пиёдаларидан 1012 нафар, ГРУ махсус қўшинларидан 500 нафар, ҳарбий учувчилардан 248 нафар, ФСБ ва ФСО ходимларидан 86 нафари ҳалок бўлгани аниқланган.
Украинага кенг кўламли босқин уюштирилганидан буён, гарчи ҳокимият хизматга энди жалб қилинган аскарларни урушга ташламасликни ваъда қилганига қарамасдан, 121 нафар чақирилувчи ҳалок бўлган. Россия 1426 нафар 20 ёшгача бўлган аскаридан айрилган.
