ОАВ: Си Цзиньпин Европага ташрифи чоғида Европа Иттифоқи ва АҚШ ўртасида зиддият келтириб чиқаришга уринди
Хитой етакчиси Си Цзиньпин Европага ташрифи чоғида қитъада сиёсий бўлинишни, АҚШ ва Европа Иттифоқи (ЕИ) ўртасида кескинликни келтириб чиқаришга ҳаракат қилди.
Бу ҳақда «Bloomberg» агентлиги маълум қилди.
Агентликнинг таъкидлашича, Си Цзиньпиннинг Францияга ташрифи унчалик катта фойда келтирмаган бўлсада, унинг Сербия ва Венгрияга ташрифи самаралироқ бўлган.
«Си янги совуқ урушга йўл қўймаслик зарурлиги ҳақида гапирсада, унинг дипломатияси Европа шарқини ғарбга қарама-қарши қўйиш орқали ўтган урушдаги бўлинишларни жонлантирди», — дейилади хабарда.
Франция президенти Эммануэл Макрон яқинроқ шахсий алоқаларни ўрнатиш орқали Хитой раҳбарини Россиянинг Украинага қарши урушини тугатиш учун Владимир Путинга таъсир ўтказишга кўндира олишига умид қилган. Бироқ, Си Цзиньпин Хитойнинг позициясини унчалик ўзгартирмади.
Еврокомиссия раҳбари Урсула фон дер Ляен ҳам урушнинг экзистенциал хусусиятини қайд этди, бироқ Си Цзиньпин қаршилик кўрсатишга уринди ва Хитойни Украинадаги уруш учун танқид қилмасликка чақирди.
«Bloomberg»нинг ёзишича, Си Цзиньпин АҚШ ва Европа Иттифоқи ўртасида кескинликни келтириб чиқаришга уринган, бироқ у муваффақиятга эришди, дейиш жуда қийин.
Кейинроқ Урсула фон дер Ляен Европа Иттифоқи Хитойнинг адолатсиз савдо амалиётига қарши курашиш учун барча мавжуд воситалардан фойдаланишга тайёрлигини айтган.
Журналистлар, шунингдек, бу Хитойнинг ЕИни бўлишга биринчи уриниши эмаслигини қайд этди. 2012 йилда Пекин Марказий ва Шарқий Европанинг 16 та давлати билан муносабатларни мустаҳкамлаш механизмини яратди, бироқ кейинчалик бу ташаббус амалга ошмади.
