НАТО бош котиби Европада қурол ишлаб чиқаришни оширишга чақирди
НАТО бош котиби Йенс Столтенберг альянсга аъзо Европа давлатлари ҳудудида қурол ишлаб чиқаришни кўпайтиришга чақирди. Бу ҳақда «DW» нашри хабар берди.
«Украинага етказиб беришни кўпайтириш ва ўз захираларимизни тўлдиришимиз учун саноат базамизни тезда қайта қуришимиз ва кенгайтиришимиз керак », деди у «Welt am Sonntag» нашрига берган интервьюсида.
Столтенбергнинг сўзларига кўра, ҳозирги ишлаб чиқариш суръати, тинчлик даврига мос келади, аммо кенг кўламли можаро учун эмас.
Шу билан бирга, НАТО бош котиби альянс Россия билан уруш бўлишини кутаётгани йўқлигини, балки ўнлаб йиллар давом этиши мумкин бўлган қарама-қаршиликка тайёрланиши кераклигини эслатди. У Украинада Владимир Путиннинг ғалаба қозонишига йўл қўймаслик муҳим вазифа эканини таъкидлади: «Агар Путин Украинада ғалаба қозонса, Россия тажовузкорлиги бошқа мамлакатларга тарқалмаслигига кафолат йўқ».
