Куба АҚШни Исроилнинг Ғазо секторидаги ҳаракатларига ёрдам беришда айблади
Куба Қўшма Штатларни Исроилнинг Ғазо секторидаги жиноятларига шерикликда айблади. Бу ҳақда Гавана номидан тингловларда сўзга чиққан Куба Республикаси ташқи ишлар вазири ўринбосари Анайанси Родригес маълум қилди.
Гаагада Халқаро судда Исроилнинг босиб олинган Фаластин ҳудудларидаги ҳаракатларининг ҳуқуқий оқибатларига бағишланган тингловлар давом этмоқда.
«Исроилнинг босқинчи давлатининг ноқонуний куч ишлатиши туфайли Фаластин халқи, аёллар ва умуман тинч аҳоли қирғин қилишда давом этмоқда. Бу қирғин халқаро ҳуқуқ бўйича геноцид, уруш жиноятлари ва инсониятга қарши жиноятлар учун жавобгар бўлган Қўшма Штатлар каби давлатлар иштирокида содир бўлмоқда», деди Родригес.
Куба ТИВ раҳбари ўринбосари Исроилнинг Фаластин ерларини босиб олиши халқаро ҳуқуқ нуқтаи назаридан ноқонуний эканлигини қайд этди.
«Исроилнинг тинч аҳоли ва жангчилар ўртасида фарқ қилмаслик сиёсати кўп йиллик ишғол, қийноқлар, мажбуран кўчирилиш, ҳибсга олиш ва Фаластин фуқаролиги ҳуқуқларини рад этишнинг давомидир», деди Родригес.
«Исроил Фаластиндаги қонунбузарликлари билан БМТ Бош Ассамблеяси, Хавфсизлик Кенгаши ва Халқаро Суд томонидан қабул қилинган кўплаб резолюция ва қоидаларни эътиборсиз қолдирди», деб таъкидлади у.
Вазир ўринбосарининг айтишича, Қўшма Штатлар БМТ Хавфсизлик Кенгашидаги вето ҳуқуқидан фойдаланиб, халқаро ҳамжамиятнинг Фаластин масаласида самарали чоралар кўришига 47 марта тўсиқлар яратган.
«Исроилнинг ноқонуний хатти-ҳаракатлари Қўшма Штатларнинг ҳақиқий ҳаракатсизлиги ва Хавфсизлик Кенгашидаги вето ҳуқуқини суиистеъмол қилиш ва масъулиятсиз ишлатишнинг бевосита натижасидир», деди у.
