Коронавирус: Россия иқтисодиёти кунига 100 млрд рубль йўқотмоқда

Россияда COVID-19 касаллиги тарқалишига қарши кураш учун жорий қилинган чекловлар сабабли мамлакат иқтисодиёти кунига 100 миллиард рубль (1,3 миллиард доллар) йўқотмоқда. Бу ҳақда Россия иқтисодий ривожланиш вазири Максим Решетников маълум қилди, деб ёзмоқда «ТАСС».

Решетниковнинг сўзларига кўра, 2020 йилда Россия бюджетининг дефицити ЯИМнинг 4,5-5 фоизи миқдорида бўлиши мумкин, бироқ давлатнинг барча ижтимоий мажбуриятлари бажарилади. Россия Марказий банки 2020 йилда мамлакатнинг иқтисодий ўсиши 6 фоизга пасайишини тахмин қилди.

2020 йилнинг февраль ойида, эпидемия ҳали Россияга кириб келмаган бир шароитда, Плеханов номидаги Россия иқтисодиёт университети доценти Олег Чередниченко вируснинг ўткир кечиш даврида мамлакат иқтисодиётининг йўқотишини 100 миллиард рублга баҳолаган.

Ўшанда Россия молия вазири Антон Силуанов эпидемия туфайли  Хитой билан савдо айланмаси пасайгани сабабли Россия иқтисодиёти кунига 1 миллиард рубль (13 миллион доллар) йўқотаётганини айтган. Бироқ март ойида вазир коронавирус сабабли мамлакат иқтисодиётининг бир қатор соҳаларида пасайиш бўлаётганини тан олган.

Апрель ойининг ўртасида туризм бўйича федерал агентлик раҳбари Зарина Догузова биринчи ярим йиллик охирида Россиянинг туризмдан кўрадиган йўқотиши 1,5 триллион рублни (20 миллиард доллар) ташкил этиши ҳақида огоҳлантирган.

Россиянинг миллий рейтинг агентлиги таҳлилчиларининг фикрича, Россия иқтисодиётининг коронавирусдан энг кўп зарар кўрган соҳалари 17,9 триллион рубль (230 миллиард доллар) йўқотиши мумкин.