Ер майдонлари олиб беришни ваъда қилган фирибгарлар ушланди
Бош прокуратура ҳузуридаги Департамент ҳамда ДХХнинг Навоий вилояти бошқармалари томонидан ўтказилган тезкор тадбирда фуқаро Х.Я. Кармана туманидаги “К.” фермер хўжалигининг 3 гектар ер майдонини фуқаро Ш.Х.га кадастр ҳужжатларини расмийлаштириб олиб бериши эвазига 28 000 АҚШ доллари ва 200 млн сўмни олган вақтида ашёвий далиллар билан ушланган.
Департамент ҳамда ДХХнинг Тўрақўрғон тумани бўлимлари томонидан ўтказилган тезкор тадбирда фуқаро С.К. бошқа бир фуқаро М.Книнг боғдорчиликка ихтисослашган 27 сотих ер майдонини фуқаро Б.З.га танишлари ёрдамида 15 000 АҚШ доллари эвазига расмийлаштириб олиб беришини айтиб, олдиндан 3 400 АҚШ доллари ва 7,4 млн сўмни олган вақтида ашёвий далиллар билан ушланган.
Шу каби, Департаментнинг Пахтаобод туман бўлими ДХХ ва ИИБ ходимлари ҳамкорлигида ўтказилган тезкор тадбирда “Б.Қ.” фермер хўжалиги иш юритувчиси Н.Б. фуқаро З.Б.га деҳқон хўжалиги ташкил қилиш учун ажратилган 10 сотих ер майдонини фуқаро Ю.Н.га 8 000 АҚШ долларига уй-жой қуриш учун сотишга келишиб, гўёки кадастр бўлимида ишловчи танишлари ёрдамида ҳужжатларини расмийлаштириб бериши эвазига 1 600 АҚШ долларини қўлга киритиб, яна 1 400 АҚШ долларини олган вақтида ашёвий далиллар билан бирга ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
