Барчаси жорий йилги олий ва профессионал таълим муассасаларига кириш имтиҳонлари ҳақида...

Жорий йил олий ва профессионал таълим муассасаларига кириш имтиҳонлари июль-август ойларида ўтказилиши белгиланиб, дастлаб касбий/ижодий имтиҳонлар 5–19-июль кунлари ўтаказилиши тасдиқланди

Бу ҳақда АОКАда ўтказилган брифингда Олий таълим, фан ва инновациялар вазирлиги ахборот хизмати раҳбари Назокат Абдуқундузова 2024/2025 ўқув йили учун олий ва профессионал таълим муассасаларига кириш имтиҳонларини ўтказиш ҳамда магистратурага қабул тартиби бўйича фуқаролардан келган саволлар бўйича маълумот берди.

Брифинг

2024/2025 ўқув йили учун олий ва профессионал таълим муассасаларига кириш имтиҳонларини ўтказиш ҳамда магистратурага қабул тартиби бўйича фуқаролардан келган саволларга жавоблар

1. Олий таълим муассаслаларига имтиҳонлар қачондан бошланади?

Президент фармонига мувофиқ, жорий йил олий ва профессионал таълим муассасаларига кириш имтиҳонлари июль-август ойларида ўтказилиши белгиланган. Шунга кўра, дастлаб касбий/ижодий имтиҳонлар 53 та олий таълим муассасасида 5–19-июль кунлари ўтаказилиши тасдиқланди. Яъни эртадан бошлаб белгиланган Олий таълим муассасаларида спорт, санъат, журналистика каби алоҳида иқтидор талаб этадиган йўналишларда касбий/ижодий имтиҳонлар бошланади.

Билимни баҳолаш агентлиги томонидан ўтказиладиган тест синовларини санаси бўйича маълумот расман тасдиқлангандан сўнг вазирликнинг расмий саҳифалари орқали қўшимча хабар берилади.

2. Имтиҳонга кириш учун рухсатномаларни қаердан олса бўлади?

Рухсатнома абитуриентнинг my.uzbmb.uz сайтидаги шахсий кабинетида шакллантирилади. Абитуриент рухсатномасида имтиҳонлар ўтказиладиган манзил, куни ва вақти тўғрисидаги маълумотлар кўрсатилган бўлади. Ҳозирда касбий/ижодий имтиҳонларга кирадиган абитуриентлар шахсий кабинетларидан рухсатномаларни юклаб олишлари мумкин.

Тест синовларига кириш учун рухсатномалар ҳам my.uzbmb.uz сайтида шакллантирилмоқда. Жараён якунлангандан сўнг, абитуриентлар шахсий кабинетидан юклаб олишлари мумкин бўлади.

3. Рўйхатан ўтган телефон сим картаси йўқолиб қолса, қандай қилиб рухсатнома олинади?

Рухсатномаларни my.uzbmb.uz сайтидаги абитуриент шахсий кабинетидан юклаб олишлари мумкин. Бунда онлайн рўйхатдан ўтишдаги телефон рақам логин ўрнида ҳамда ўзлари қўйган паролни киритган ҳолда шахсий кабинетга кириб, рухсатномани юклаши мумкин. Агарда телефон сим картаси йўқолган ва парол ёддан кўтарилган бўлса, қуйидагиларни амалга ошириш тавсия этилади:

- Алоқа компаниясига бориб, рўйхатдан ўтган рақамни қайта тиклаш (сим картани янгилаш);

- Ёки бунинг ҳам имкони бўлмаганда Билимни баҳолаш агентлиги ва унинг ҳудудий бўлимларига шахсини тасдиқловчи ҳужжат билан мурожаат қилганда, мурожаатчи сўраган бошқа телефон рақамига ўзгартириб берилади.

4. Кечикиб келган абитуриентларга имтиҳонга киришга рухсат бериладими?

Имтиҳонга кечикиш мумкин эмас. Имтиҳонларнинг бошланиш аниқ вақти абитуриент рухсатномасида ёзилган бўлади. Шу боис, абитуриентлардан рухсатномада белгиланган муддат ва манзилга имтиҳон бошланишидан бир соат олдин етиб боришлари сўралади.

5. Тест синови куни айрим сабабларга кўра бошқа вилоятда бўлиб қолган абитуриент ўша вилоятда тест синовидан ўтса бўладими?

Йўқ, абитуриент онлайн рўйхатдан ўтиш вақтида қайси вилоятни белгилаган бўлса, айни шу ҳудудда ташкил этилган имтиҳонда қатнашиши мумкин. Боиси, шу абитуриент учун тест материаллари айни у белгилаган ҳудуд учун ажратилган бўлади ва уни алмаштириш имкони мавжуд эмас.

6. 5 тагача йўналишни танлаш сақлаб қолинганми?

Ҳа, бу йил ҳам абитуриентлар кириш имтиҳонларининг якуний натижалари чиққандан сўнг, мутахассислик фанларига мос 5 тагача йўналишни танлаш имконияти эга бўлади. Бунинг учун уларга тест синовлари тўлиқ якунланганидан сўнг 15 кун муҳлат берилади. Ушбу муддат давомида абитуриентлар олий таълим муассасаси, бакалавриат таълим йўналиши ва таълим шаклини танлайди.

7. Магистратурага талабалар қай тартибда қабул қилинади?

Белгиланган тартибга кўра, давлат олий таълим муассасалари магистратурасига қабул абитуриентнинг бакалавриат диплом бали ўртача кўрсаткичи ҳамда хорижий тилни билиш даражаси бўйича тегишли миллий ёки халқаро сертификат бали асосида амалга оширилади. Бунда, баллар кетма-кетлигига қатъий риоя қилинади ҳамда қўшимча имтиҳон ўтказилмайди.

8. Магистратурага ўқишга қабул қилинган ёки қабул қилинмаганлиги тўғрисидаги натижа қачон эълон қилинади?

Магистратурага қабул қилиш белгиланган қабул квоталари доирасида баллар кетма-кетлигига қатъий риоя қилган ҳолда Давлат комиссияси томонидан амалга оширилади. Давлат комиссиясининг олий таълим муассасалари магистратурасига қабул қилиш тўғрисидаги қарори 20 августга қадар тасдиқланиши белгиланган.

9. Ижтимоий тармоқларда талабалар ўқишини нодавлат олий таълим ташкилотларидан давлат олийгоҳларининг мос ва турдош бўлмаган (яъни, нотурдош) таълим йўналишларига кўчириш тартибига изоҳ берсангиз.

Ижтимоий тармоқларда талабалар ўқишини нодавлат олий таълим ташкилотларидан давлат олийгоҳларининг мос ва турдош бўлмаган (яъни, нотурдош) таълим йўналишларига кўчириш тартиби алоҳида янгилик сифатида нотўғри талқин қилинмоқда.

Аслида талабалар ўқишини республикада фаолият юритаётган хорижий ва нодавлат олий таълим ташкилотларидан давлат олий таълим муассасаларига кўчириш тартиби Президентнинг 2022-йил 15-июндаги ПҚ-279-сон қарори билан тасдиқланган. Унга кўра, мос ва турдош таълим йўналишларига кўчириш учун талабадан алоҳида иқтидор талаб этиладиган таълим йўналишлари бўйича касбий (ижодий) имтиҳонлар, бошқа таълим йўналишлари бўйича тест синовлари ўтказилади. Бунда, касбий (ижодий) имтиҳонлар тегишли олий таълим муассасаси томонидан, тест синовлари Билим ва малакаларни баҳолаш агентлиги томонидан ўтказилади.

Тест синовлари ва касбий (ижодий) имтиҳонлар бўйича ўтиш баллари ҳар йили 15 июлга қадар Олий таълим, фан ва инновациялар вазирлиги ҳамда тизимида олий таълим муассасалари бўлган вазирлик ва идоралар томонидан белгиланади ҳамда Билим ва малакаларни баҳолаш агентлигининг расмий веб-сайтида эълон қилинади.

Ўтиш балидан паст балл тўплаган талабалар бакалавриатга қабул қилишдаги тартибга мувофиқ табақалаштирилган тўлов-контракт асосида ўқишга қабул қилинади.

Давлат олий таълим муассасаларининг мос ва турдош бўлмаган (яъни нотурдош) таълим йўналишларига кўчириш ўрнатилган тартибда, тегишли бакалавриат таълим йўналиши учун белгиланган табақалаштирилган тўлов-контрактнинг минимал миқдорига тенг бўлган бир марталик тўлов асосида амалга оширилади. Яъни, табақалаштирилган тўлов-контрактнинг минимал миқдори ҳар йили Давлат комиссияси томонидан белгиланади ва у йўналишга қараб базавий тўлов-контракт миқдорининг 8 бараваридан 25 бараваригача бўлиши мумкин.

Шу ўринда, ўқишни кўчириш жараёнида намунавий ўқув режаларидаги умумкасбий ва ихтисослик (мутахассислик) фанлари бўйича фарқлар 4 тадан ошганда фуқаронинг ўқишини кўчириш ва қайта тиклаш ҳақидаги аризасига рад жавоби берилади ёки GPA ўтиш баллини тўплай олмаган талаба сифатида қайта ўқиш учун тегишли курсда қолдириш таклифи берилади. Бунда курсдан курсга қолган талабалар фақат қарздор бўлган фанларни ўзлаштириб уларга мос равишда шартнома маблағларини тўлайди.