Геннадий Головкин Қозоғистон Олимпия қўмитаси президенти бўлди
Қозоғистонлик таниқли боксчи Геннадий Головкин ўз мамлакатининг Миллий олимпия қўмитаси президенти этиб сайланди.
У бугун ўтказилган Бош ассамблеяда мазкур лавозимга сайланди.
Бу лавозимда 2015 йилдан бери Тимур Кулибаев ишлаб келаётганди.
Маълумот учун, Геннадий Головкин 1983 йилда Карагандада туғилган. Олимпия ўйинлари кумуш медали соҳиби (2004), жаҳон чемпиони (2003). Профессионал боксда ҳам IBF, WBA ва IBO камарлари соҳиби бўлган.
Геннадий Головкин 2005 йилдан буён профессионал боксда 45 та жанг ўтказган.
У 37 учрашувни нокаут билан якунлади, битта жангда дуранг қайд этди ва иккита тангда очколар ҳисобида мағлуб бўлди.
У профессионал боксдаги дебютини 2006 йилнинг май ойида Габор Балогга қарши ўтказиб, рақибини биринчи раундда нокаутга учратди. Шундан сўнг Генанинг юлдузли лаҳзалари туғилди.
Ўрта вазн тоифасида WBA чемпионлик камарини 8 марта, ўрта вазн тоифасида IBO чемпионлигини 5 марта ҳимоя қилган. Шунингдек, у ўрта вазн тоифасида нокаут бўйича 89 фоизлик улуши билан профессионал бокс тарихида биринчи ўринни эгаллади.
