Элдор Арипов: Ўзбекистон Президентининг ХХРга давлат ташрифи якунлари бўйича эришилган барча келишувлар мамлакатларимиз аҳолиси фаровонлигини оширишга қаратилган
Кеча Тошкентда Ўзбекистон Президентининг ХХРга давлат ташрифи якунларига бағишланган «Ўзбекистон ва Хитой: икки мамлакат халқлари фаровонлиги йўлида ўзаро манфаатли ҳамкорликни ривожлантириш» мавзусида халқаро конференция бўлиб ўтди, деб хабар бермоқда «Дунё» АА мухбири.
Марказий Осиё халқаро институти Хитой элчихонаси билан биргаликда СМТИ ва икки давлат савдо-саноат палаталари ҳамкорлигида ташкил этилган анжуманда Ўзбекистон ва Хитойнинг етакчи илмий-тадқиқот институтлари раҳбарлари, экспертлари ҳамда мамлакатимиздаги Хитой компаниялари вакиллари иштирок этди.
Ўзбекистон Президенти ҳузуридаги Стратегик ва минтақалараро тадқиқотлар институти (СМТИ) директори Элдор Арипов «Барча шароитларда ҳар томонлама стратегик шериклик: Ўзбекистон ва Хитой ўртасидаги муносабатларда янги босқич» мавзусидаги панель сессиясида маърузачи сифатида иштирок этди.
Эксперт ўз маърузасида икки давлат раҳбарлари саммитининг муҳим натижаларини таҳлил қилди.
Элдор Арипов Ўзбекистон Президентининг давлат ташрифи юқори самарадорлиги ҳақида гапирар экан, бир қанча асосий жиҳатларга алоҳида тўхталиб ўтди.
Биринчидан, СМТИ директорининг сўзларига кўра, Ўзбекистон-Хитой муносабатлари янги даврда барча шароитларда ҳар томонлама стратегик шериклик даражасига кўтарилгани ташрифнинг муҳим воқеаси бўлди.
«Ўтган вақт ичида биз жуда узоқ йўлни босиб ўтдик. Биз икки томонлама ҳамкорлик учун уч юзга яқин ҳужжатдан иборат жуда мустаҳкам шартномавий-ҳуқуқий асосни шакллантирдик», — деди эксперт.
Бундан ташқари, унинг фикрича, ҳукуматлараро, парламентлараро ва идоралараро даражада фаол сиёсий мулоқот йўлга қўйилган.
Қўшма баёнотнинг қабул қилиниши билан муносабатлар шу қадар юқори сиёсий ишонч даражасига кўтарилдики, улар халқаро вазият динамикасидан қатъи назар, барқарор бўлиб қолади.
Иккинчидан, икки давлат раҳбарларининг саммити Ўзбекистон-Хитой муносабатлари ўзаро манфаатдорлик тамойилига асосланишини тасдиқлади.
Элдор Арипов таъкидлаганидек, «Бизнинг кун тартибимиз ҳар қандай геосиёсий вазиятдан ташқарида бўлиб, соф прагматик контекстга эга».
Олий даражадаги музокаралар якунлари бўйича эришилган барча келишув ва шартномалар аниқ натижаларни кўзлаб, ижтимоий-иқтисодий муаммоларни ҳал этиш ва аҳоли фаровонлигини оширишга қаратилган. Хусусан, ушбу ҳужжатларда Ўзбекистон қишлоқ хўжалиги маҳсулотлари импортини кенгайтириш, сувни тежайдиган технологияларни жорий этиш, камбағалликни қисқартириш соҳасида кадрлар тайёрлаш ва бошқа кўплаб масалалар кўзда тутилган.
Шу нуқтаи назардан, улар асосан Президент Шавкат Мирзиёев томонидан Янги Ўзбекистон қурилиши доирасида олиб борилаётган ислоҳотларни қўллаб-қувватлашга қаратилган.
Учинчидан, ташриф икки давлат ўртасида тамоман янги йўналишларда ҳамкорлик йўлга қўйилганини кўрсатди.
Шу тариқа, олий даражадаги музокаралар натижасида электрон тижорат соҳасида ҳамкорликни фаоллаштириш бўйича келишувга эришилди.
Элдор Ариповнинг айтишича, 2022 йилда Хитойда онлайн савдолар ҳажми қарийб 2 триллион долларни ташкил этди. Бу бозорни ишлаб чиқарувчиларимиз томонидан ўзлаштирилиши уларга Хитой бозорини эгаллашда улкан имкониятлар эшигини очади. Шунингдек, Ўзбекистон иқтисодиётининг кўплаб тармоқларини ривожлантиришга кучли туртки беради.
Икки мамлакат ўртасидаги ҳамкорликнинг янги истиқболли йўналишлари — бу электромобиллар соҳасидаги ҳамкорликдир.
Ўзбекистонда охирги уч йил ичида ушбу транспорт воситалари сотуви 10 баробар ошди. Хитойнинг жами автомобиль импортидаги улуши 36 фоиздан 80 фоизга ошди.
Давлат ташрифи чоғида Президент Шавкат Мирзиёев ва «BYD» компанияси раҳбари ҳамкорликда Жиззах вилоятида электромобиллар ва гибрид автомобилларни йиғиш лойиҳасини ишга туширгани мамнуният билан таъкидланди. Шуниси эътиборга лойиқки, бу «BYD» компаниясининг Хитойдан ташқаридаги биринчи қўшма қўшма корхонаси бўлади.
Тўртинчидан, Урумчи шаҳрида бўлиб ўтган минтақалараро форуми якунлари бўйича Ўзбекистон ва Хитой ҳудудлари кенгаши тузилди.
«Бу минтақалар ўртасидаги ўзаро алоқаларни форумдан форумга эмас, балки доимий равишда сақлаб қолиш имконини берадиган жуда муҳим қадамдир. Икки мамлакат ҳудудлари ўртасидаги тўғридан-тўғри алоқалар, моҳиятан барча соҳалардаги ҳамкорликни амалга оширишни таъминлайдиган мустаҳкам боғловчи механизмлар вазифасини ўтайди», — дея қайд этди СМТИ раҳбари.
