O‘zbekiston Respublikasi Prezidenti Shavkat Mirziyoyevning Osiyo Olimpiya kengashining 46-Bosh assambleyasidagi nutqi

Hurmatli do‘stlar!

Xonimlar va janoblar!

Bugun dunyoda globallashuv tobora kuchayib, ziddiyatli va tahlikali jarayonlar ko‘payib borayotgani hech kimga sir emas. Bunday murakkab vaziyatda davlatlar va xalqlar o‘rtasidagi muloqot, o‘zaro tushunish va hamkorlikni mustahkamlashda sportning beqiyos o‘rni bor.

Tinchlik va do‘stlik elchisi bo‘lgan sportning butun bashariyatni, jumladan, biz yashayotgan Osiyo qit’asi xalqlarini birlashtirishdagi o‘rni va ta’sirini hech narsa bilan o‘lchab, baholab bo‘lmaydi.

Osiyo Olimpiya Kengashi qit’amizning 4 milliard 800 milliondan ortiq aholisini birlashtirib, Olimpiya harakatining do‘stlik, o‘zaro hurmat, adolat va tenglik kabi ezgu g‘oyalarini faol targ‘ib etmoqda. Sizlar mintaqamizdagi ijobiy o‘zgarishlarga ulkan hissa qo‘shib, sport diplomatiyasi orqali “Jipslashgan Osiyo” namunasini ko‘rsatib bermoqdasiz.

Fursatdan foydalanib, bizga yuksak ishonch bildirib, Osiyo Olimpiya Kengashining 46-Bosh Assambleyasini mamlakatimizda o‘tkazayotgani uchun Kengash rahbariyatiga O‘zbekiston Prezidenti va Milliy Olimpiya qo‘mitasi rahbari sifatida alohida minnatdorlik bildiraman.

Bugun mana shunday tarixiy anjumanda Sizlar bilan go‘zal va betakror yurtimiz zaminida uchrashib turganimizdan mamnunman.

O‘zbekistonga xush kelibsiz!

Hurmatli assambleya ishtirokchilari!

Bugun cizlar qit’amizda o‘zaro ishonch, ahillik va hamjihatlik rishtalarini mustahkamlashga xizmat qilayotgan yirik platforma – Osiyo Olimpiya Kengashining Bosh Assambleyasida juda ko‘p masalalarni muhokama qildingiz. Shular qatorida aynan Toshkent shahrida Kengashning Prezidenti lavozimiga saylov bo‘lib o‘tayotgani ham, shubhasiz, ulkan tarixiy voqeadir.

Ushbu yuksak lavozimga bir ovozdan saylangan Shayx Jav’an bin Hamad ol Soniy Hazrati Oliylarini samimiy qutlashga ijozat bergaysiz.

O‘tgan yili aprelda – bugun yangi saylangan Prezident bilan uchrashuvimiz chog‘ida sportni rivojlantirish borasida sermazmun suhbat qilgan edik. Shayx Jav’an hazratlari Milliy Olimpiya qo‘mitalari assosiasiyasining birinchi vise-prezidenti sifatida Qatarda futbol va suv sporti bo‘yicha jahon chempionatlari kabi ko‘plab yirik sport tadbirlarini yuqori saviyada o‘tkazgan, katta bilim va tajribaga ega shaxs. Bu inson o‘zining noyob salohiyati va samarali faoliyati bilan nafaqat Osiyo qit’asi, balki butun dunyoda sport rivojiga ulkan hissa qo‘shmoqda. Bugun Osiyo Olimpiya Kengashi mana shunday malakali nomzodni Prezident lavozimiga saylab eng to‘g‘ri qarorni qabul qildi, deb o‘ylayman.

Ishonamanki, Shayx Jav’an hazratlarining bevosita rahbarligida Osiyo Olimpiya Kengashining nufuzi bundan ham yuksaladi.

Hurmatli tadbir ishtirokchilari!

Biz so‘nggi yillarda Osiyo Olimpiya Kengashi bilan ko‘p qirrali hamkorlik aloqalarini yangi bosqichga ko‘tardik. Jumladan, 2022 yilda Osiyo Olimpiya Kengashi Ijroiya qo‘mitasining 77-sessiyasini mamlakatimizda muvaffaqiyatli o‘tkazdik. Ushbu nufuzli Tashkilot tomonidan O‘zbekiston vakili ilk bor Markaziy Osiyo mintaqasi bo‘yicha vise-prezident etib saylandi.

2029 yilgi Yoshlar Osiyo o‘yinlariga mezbonlik qilish uchun aynan O‘zbekiston tanlanganini biz mamlakatimizga mas’uliyatli sport hamkori sifatida berilgan yuksak baho, deb qabul qilamiz. Bu ishonch esa bizga qo‘shni va qardosh bo‘lgan Markaziy Osiyo davlatlari bilan sport aloqalarini mustahkamlash uchun puxta zamin yaratmoqda.

Shu o‘rinda Osiyo Olimpiya Kengashi Bosh direktori va “World Aquatics” federasiyasi rahbari Husayn al-Musallam janoblari o‘zbek sportining uzoq yillik va ishonchli do‘sti ekanini alohida ta’kidlashni istar edim. Bu kishi 1993 yildan buyon yurtimizga muntazam tashrif buyuradi. O‘zbekistonga katta mehr qo‘yib, mamlakatimizning xalqaro sport bo‘yicha tashabbuslarini faol qo‘llab-quvvatlab kelmoqda.

Janob Husayn al-Musallam nafaqat Osiyoda, balki xalqaro miqyosda o‘zining aql-zakovati, qat’iyat va irodasi, barchaga birdek munosabati bilan keng sport jamoatchiligi ishonchini qozongan. Suv sporti barcha turlarining butun dunyoda yangi bosqichga ko‘tarilgani bu fikrning yaqqol tasdig‘idir. Xususan, Los-Anjeles – 2028 Olimpiya o‘yinlarida suv sporti turlari dasturi 49 tadan 55 taga ko‘paygani, eng avvalo, rivojlanayotgan davlatlar uchun yangi imkoniyat bo‘ldi.

Kuni kecha yurtimizda “World Aquatics” federasiyasi Ijroiya qo‘mitasining yig‘ilishi o‘tkazilib, uning Mintaqaviy filiali tashkil etilgani Markaziy Osiyo sport hamjamiyati uchun katta ko‘mak va madad bo‘lishi shubhasiz.

Ta’kidlash joizki, Osiyo Olimpiya Kengashi amalga oshirayotgan ishlarni butun dunyo sport jamoatchiligi har jihatdan tan olmoqda. Jumladan, Xalqaro olimpiya qo‘mitasi prezidenti Kirsti Koventri xonimning Bosh Assambleyaga yo‘llagan videomurojaati ham bunga yaqqol misoldir.

Anjumanda Xalqaro olimpiya qo‘mitasi vakillari sifatida Jeyms Makleod va Birlashgan kurash dunyosi prezidenti Nenad Lalovich ishtirok etayotgani ham ana shunday yuksak e’tiborning dalilidir.

Fursatdan foydalanib, Assambleya ishida biz bilan birga ishtirok etayotgan Xalqaro antidoping agentligi prezidenti Vitold Banka, Xalqaro gimnastika federasiyasi prezidenti Morinari Vatanabe, Og‘ir atletika federasiyasi prezidenti Muhammad Jalud, “World Boxing” prezidenti Gennadiy Golovkin, Chim ustida hokkey federasiyasi prezidenti Muhammad Tayyab Ikram, Xalqaro qilichbozlik federasiyasi vise-prezidenti Anna Delgado, Osiyo Paralimpiya qo‘mitasi raisi Majid Rashid, Milliy Olimpiya qo‘mitalari assosiasiyasi Bosh kotibi Gunilla Lindberg, Afrika Olimpiya qo‘mitalari assosiasiyasi prezidenti Mustafo Berraf janoblariga alohida tashakkur aytaman.

Bundan tashqari, anjumanimizda biz bilan bir safda turgan qadrli mehmonlarimiz – AQSh Prezidentining maxsus vakili Paolo Zampolli, Rossiya Federasiyasi sport vaziri Mixail Degtyarev, Saudiya Arabistoni sport vaziri Shahzoda Abdulaziz bin Turki ol Saud, Qatar yoshlar va sport vaziri Shayx Hamad ol Soniy, Iordaniya Olimpiya qo‘mitasi Prezidenti Shahzoda Faysal al-Hussayn, Bruney Dorussalom Milliy Olimpiya qo‘mitasi Prezidenti Shahzoda Sufri Bolqiyax, Butan Olimpiya qo‘mitasi Prezidenti Shahzoda Jigyel Ugyen Vangchuk, Kuvayt Milliy Olimpiya qo‘mitasi Prezidenti Shayx Fahad Saboh as-Saboh hazratlariga ham o‘z hurmatimizni bildiramiz.

Qadrli mehmonlar!

Biz Yangi O‘zbekistonda yoshlarimizni xalqaro olimpiada harakatining gumanistik g‘oyalariga sadoqat ruhida tarbiyalashda, eng avvalo, qadimiy tariximiz va boy madaniyatimiz, milliy qadriyat va urf-odatlarimizga tayanamiz.

Bu haqda gapirganda, mashhur milliy eposimiz “Alpomish” dostonining bosh qahramonlari – mard va yengilmas pahlavon Alpomish hamda azmu shijoatli, jasur Barchinoy asrlar davomida yurtimizdagi millionlab yigit-qizlar uchun ideal namunasi bo‘lib kelayotganini ta’kidlash o‘rinlidir.

Shu ma’noda, sport dunyosiga, sport tarbiyasiga xos ezgu fazilatlar xalqimizning genetik kodida azal-azaldan mavjud, desam, yanglishmagan bo‘laman. Bunday xususiyatlar sportchilarimizning jahon arenalarini zabt etishida katta tajriba, mahorat va ilhom maktabi bo‘lib xizmat qilmoqda.

Bugungi kunda yurtimizda aholini ommaviy sport bilan qamrab olish darajasi 15 million kishiga yetdi. Aholining 60 foizini yoshlar tashkil etadigan mamlakatimiz uchun bu qanday katta ahamiyatga ega ekanini barchangiz yaxshi tushunasiz, albatta.

Biz, islohotlarimizning ilk kunlaridanoq, barcha sohalar qatori jismoniy tarbiya va sportni rivojlantirishga ham katta e’tibor qaratdik. Olimpiya harakati targ‘ibotini eng quyi bo‘g‘indan boshlash va seleksiyani kengaytirish maqsadida uch bosqichli “Prezident Olimpiadasi” kompleks sport musobaqalari tizimini yo‘lga qo‘ydik. Bu musobaqalarning har bir bosqichiga xalqaro sport mezonlari va talablari tatbiq qilindi.

O‘tgan yili 100 gektarlik hududda barpo etilgan Olimpiya shaharchasi nufuzli sport tadbirlarini o‘tkazish uchun har tomonlama munosib maydonga aylandi.

Yaratilgan imkoniyat va sharoitlarga mos ravishda sport sohasidagi yutuqlarimiz ham o‘sib bormoqda. Parij – 2024 Olimpiya va Paralimpiya o‘yinlarida sportchilarimiz 13-o‘rinni egalladi. O‘tgan yili jahon, Osiyo va Olimpiya o‘yinlarida 50 dan ortiq o‘g‘il-qizlarimiz rekord natijalarni qo‘lga kiritdi. Yoshlarimiz 2025 yil Bahraynda o‘tkazilgan Osiyo Yoshlar o‘yinlari va Saudiyada Islom birdamligi musobaqalarida faxrli 2-o‘rinni egalladi.

So‘nggi yillarda yurtimiz og‘ir atletika, boks, dzyudo, eshkak eshish, voleybol, gimnastika, futzal kabi 10 dan ziyod sport turlari bo‘yicha jahon chempionati va kubogi musobaqalariga munosib mezbonlik qildi.

Olimpiya o‘yinlariga tayyorgarlik ko‘rish, samarali seleksiya bo‘yicha yangi tizim yaratdik. Biz yuqori mahoratli sportchilarni tayyorlash ishlarini bundan buyon ham izchil davom ettirish uchun zamonaviy sport infratuzilmalarini barpo etishga, sohaga raqamlashtirish va innovasiyalarni keng joriy qilishga, xalqaro standartlarni faol tatbiq etishga, sport diplomatiyasini kuchaytirishga katta e’tibor qaratamiz.

Bundan tashqari, halol sport tamoyiliga amal qilib, dopingga qarshi kurashning qat’iy tarafdori bo‘lib qolamiz. Bu borada Butunjahon antidoping agentligining adolatli siyosatini to‘liq qo‘llab-quvvatlaymiz.

Bugun ushbu Agentlik tomonidan Toshkentda Markaziy Osiyo mintaqaviy antidoping tashkilotlarining yig‘ilishi va Xalqaro forum o‘tkazilayotgani muhim ahamiyatga ega. Ushbu tadbir mahalliy mutaxassislar uchun antidoping qoidalari bo‘yicha tajriba almashish imkoniyatini berishi shubhasiz.

Shuningdek, anjumanda qatnashayotgan xalqaro sport tashkilotlarida 50 dan ortiq yurtimiz vakillari samarali faoliyat yuritayotganini ham mamnuniyat bilan ta’kidlaymiz.

Tadbir doirasida Xalqaro va Osiyo sport tashkilotlari bizning milliy sport federasiyalarimiz bilan 20 dan ziyod muhim bitimlar imzolaganini ham olqishlaymiz. Ular o‘z yo‘nalishlarida har bir hududimizdan 1 tadan sport maktabini tanlab olib, haqiqiy namunaga aylantirish uchun ko‘maklashayotganidan minnatdormiz.

Misol uchun, Xalqaro og‘ir atletika federasiyasi – Bo‘stonliq tumanida Akbar Jo‘rayev nomidagi og‘ir atletika sport klubini zamonaviy ilmiy yondashuv asosida rivojlantirish; Birlashgan kurash dunyosi tashkiloti – Mintaqaviy sport kurashlari akademiyasini tashkil etish; Osiyo voleybol konfederasiyasi – har bir viloyatimizda voleybol bo‘yicha 1 tadan sport klubini bunyod etish; Chim ustida hokkey xalqaro federasiyasi – Toshkent va Xorazm viloyatlarida 2 ta stadion qurish kabi aniq maqsad va natijaga yo‘naltirilgan kelishuvlarga erishgani quvonarlidir.

Mazkur loyihalarni to‘la-to‘kis amalga oshirish uchun mening joylardagi vakillarim bo‘lgan hokimlar va sport federasiyalarimiz rahbarlari shaxsan mas’ul bo‘ladi.

Ishonamanki, bunday yangi xalqaro hamkorlik mexanizmi sportimiz ravnaqiga beqiyos amaliy hissa qo‘shadi.

Hurmatli delegasiyalar a’zolari!

Endi sizlarning ishtirokingizda Olimpiya harakatini rivojlantirish, muhim sport tashabbuslarini ilgari surishga qo‘shayotgan alohida hissasi uchun Shayx Jav’an ol Soniy hazratlarini O‘zbekiston Milliy Olimpiya qo‘mitasining “Shon-sharaf” ordeni bilan taqdirlashga ijozat bergaysiz.

So‘zimning yakunida shuni alohida ta’kidlayman: Yangi O‘zbekiston barcha davlatlar bilan sport sohasida ko‘p qirrali hamkorlikka hamisha tayyor.

Bu sharafli yo‘lda sizlar kabi yaqin do‘stlarimizga eshiklarimiz ham, yuraklarimiz ham doimo ochiq.

Barchangizga ulkan kuch-g‘ayrat, omad va zafarlar tilayman.

Doimo sog‘-omon bo‘linglar!