Tramp Xitoyga qarshi Rossiya bilan yaqinlashmoqchi

Oq uy Ukrainadagi mojaroni hal etishni Pekinni cheklash vositasi sifatida ko‘rmoqda, o‘z-o‘zidan maqsad emas.

AQSh prezidenti Donald Tramp ma’muriyati Rossiya bilan yaqinlashuv AQSh va Xitoy o‘rtasidagi global raqobatda kuchlar muvozanatini Vashington foydasiga o‘zgartirishi mumkin, deb hisoblaydi. Bu haqda Politico Oq uy vakillariga tayanib xabar berdi.

Nashr ma’lumotiga ko‘ra, strategiya Rossiyaga Ukrainadagi urushni yakunlash uchun iqtisodiy rag‘batlar berishni, uni jahon iqtisodiyotiga qaytarishni va Amerika investisiyalarini jalb qilishni nazarda tutadi. Ma’muriyat fikricha, bu Rossiya va Xitoy o‘rtasidagi yaqinlashuvni susaytiradi.

Xitoyga qarshi turish Trampning kengroq tashqi siyosat yo‘nalishiga mos keladi. Shu mantiq doirasida Kubaga bosim o‘tkazish va Venesuela prezidenti Nikolas Maduroni ag‘darishga qaratilgan harakatlar ham ko‘riladi — bu choralar Pekinning G‘arbiy yarimshardagi ta’sirini kamaytirishga qaratilgan.

Aynan shu bilan Politico Oq uy nega Ukraina bo‘yicha muzokaralar bir necha oy davomida natija bermaganiga qaramay, bu yo‘nalishdan voz kechmaganini izohlaydi — hatto Moskva Eronga Amerika nishonlariga zarba berish uchun razvedka ma’lumotlarini uzatayotgani haqidagi xabarlar fonida ham.

Kiyevda bu strategiyaga shubha bilan qaralmoqda. «Biz bunday yondashuvni avval ham sinab ko‘rganmiz — va bu hech qanday natija bermagan», — dedi nashrga ukrain amaldori, Germaniyaning «sharqiy siyosati» ham urushni to‘xtata olmaganini eslatib.