Putinning amakivachchasi 91 yoshida vafot etdi
Rossiya prezidenti Vladimir Putinning amakivachchasi Yevgeniy Putin 91 yoshida vafot etdi, deb xabar beradi IvanovoNews. Uning o‘g‘li “Gazprom” raisi o‘rinbosari, qizi esa Rossiyaning eng yirik ko‘mir kompaniyalaridan biriga egalik qiladi.
Evgeniy Putin nima sababdan va qanday vaziyatda hayotdan ko‘z yumgani noma’lum. Fevral oxirida u 91 yoshga kirgan, tug‘ilgan kunini o‘g‘li Mixailning Suzdaldagi uyida nishonlagan. Dafn marosimi 10 mart kuni bo‘lib o‘tgan.
Evgeniy Putinning oilasi 2002 yil oxirigacha Ivanovoda yashagan, Putin hokimiyat tepasiga kelgach, Moskvaga ko‘chib o‘tgan. Uning o‘g‘li Mixail “Gazprom” boshqaruv raisi o‘rinbosari bo‘lib, kompaniya boshqaruv kengashiga kiradi. Dmitriy Peskov uni Putinning “uzoq qarindoshi” deb atagan va ular muloqot qilmasligini aytgandi.
Evgeniy Putinning qizi Anna esa Kemerovo viloyati gubernatori Sergey Sivilyov bilan oila qurgan. 2018 yilda u Kuzbass rahbariga aylangan eridan Rossiyadagi eng yirik ko‘mir qazib oluvchi korxonalardan biri — “Kolmar”ning 70 foiz ulushini qo‘lga kiritgan.
Vladimir va Yevgeniy Putinlarning otalari — Vladimir Spiridonovich va Mixail Spiridonovich tug‘ishgan aka-ukalar bo‘lgan.
