Musulmon bo‘lmagan kishi namoz o‘qisa, halovat topadimi?

Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

(Qur’oni karimning ta’siri haqida voqeiy hikoya)

Men Saudiya poytaxti Ar-Riyoz shahrida ingliz tilidan tarjimonlik qilar edim. Amerikadan Suriyaga ko‘chib kelgan bir do‘stim bor edi. U bilan har-har zamon suhbatlashib turardik. Ana shunday suhbatlarning birida, Islomni qayerda qabul qilgani haqida qiziqib qoldim va so‘radim. U esa: “Amerikada Islomni qabul qilib, keyin Suriyaga ko‘chib keldik. Onamni ham Islomga da’vat qildim. Alhamdulillah, Alloh onamga ham hidoyat berib, Islomni qabul qildilar”, deb javob berdi.

Suhbat chog‘ida Amerikada bo‘lib o‘tgan biror voqeani aytib berishini so‘radim. U shunda quyidagi hayotiy voqeani so‘zlab berdi. Do‘stim aytdiki: “Biz Los-Anjelesdagi ulkan “Qirol Fahd” jomesiga borar edik. Ushbu masjid Saudiya elchixonasi nazorati ostida edi. Onam ham o‘sha masjidda namoz o‘qir edilar. Bu masjidda bir amerikalik ayol shom va xufton vaqtlarida kelib, ibodat qilardi. Boshqa ayollar bilan bir safda turib, u yoqdan-bu yoqqa alanglar, odamlarga qarab nimagadir taqlid qilayotganday bo‘lardi. Namoz o‘qishni bilmasligi hammaga ayon edi. Onam u haqda “Yaqinda Islomga kirgan bo‘lsa kerak, shuning uchun qanday namoz o‘qishni yaxshi bilmaydi, nazarimda”, degan fikrga borar edi. U ayol masjidga haftada bir yoki ikki marta kelardi. Shunday o‘tayotgan haftalarning birida onam uni oz muddatga to‘xtatdi-da: “Kechirasiz, siz musulmonmisiz?”, deb so‘radi. U esa: “Yo‘q, musulmon emasman”, deb javob qildi.

– Unda nega masjidga kelayapsiz? – so‘radi undan onam. – Balki Islomni qabul qilishni xohlarsiz?

– Yo‘q, qabul qilishni xohlamayman, – dedi u.

– Unda nega bu yerga kelasiz? – dedi onam savolini takrorlab.

– Meni anchadan buyon beoromlik va ruhiy siqilish tinch qo‘ymasdi. Bu borada ruhshunosga murojaat qildim, ular menga maxsus dori-darmonlar tavsiya qilishdi, lekin ular mutlaqo ta’sir qilmadi. Bu kasalim haqida tanishlarimga aytganimda, ular din haqida gapirishdi va: “Bu dardingning davosi din bilan bog‘liq bo‘lsa kerak. Cherkovga borib ibodat qil, balki tuzalib ketarsan”, deb maslahat berishdi. Shunday qilib, men cherkovga qatnay boshladim. U yerda rohib bizlarga qo‘shiqlar aytib, ba’zi narsalarni o‘qib berardi, biz undan to‘lqinlanar edik. Ammo bu narsalar menga hech yordam bermadi, ya’ni ruhiy siqilishim pasaymadi. Tanishlarimdan biri ibodatxonaga borib, butlarga ibodat qilishimni taklif qildi. Shunday qilib, hamma ibodatxonalarga borib, turli xil ibodatlarni qilib ko‘rdim, ammo hech qaysisi yordam bermadi. Urinib ko‘rmaganim faqat Islom dini qolgan edi. Natijalar foyda bermaganidan so‘ng, shom va xufton namozi paytida masjidga kelishni boshladim. Asr va peshin vaqti esa ayrim sabablarga ko‘ra kelolmasdim. Masjidga kelib, “kohin”ning aytayotgan qo‘shig‘ini diqqat bilan eshitib, uning qo‘shig‘idan ta’sirlanib, mahliyo bo‘lib qolgan edim. Onam unga:

– U kohin ham emas, ruhoniy ham. Balki u – imomr. Va u aytayotgan narsa – qo‘shiq emas. Uni o‘zi yozmagan, uni hech kim yozmagan. U tilovat qilayotgan narsa – Alloh taoloning kalomidir. Uni o‘zingiz o‘qib, eshitsangiz ham bo‘ladi. Internetdan qidirsangiz Qur’onni chiroyli tilovat qilgan qorilar, qiroatlar, tarjimalari bilan chiqadi. Xullas hammasi topiladi. Lekin, meni bir savol qiziqtirdi, namoz o‘qiyotgan paytingizda nimalarni his qilasiz?

– Men ham xuddi sizga o‘xshab shu yerga kelaman, imom aytayotgan “gaplar” (ya’ni, Qur’on)ni e’tibor bilan tinglayman, shunda barcha ruhiy siqilish (charchoq va qiynoqlar) barham topadi. Shu alfozda 3-4 kun xursand yuraman. Keyin, yana siqilish boshlanadi. Shu bois har 3-4 kun o‘tganda masjidga kelib turaman, - dedi u. So‘ng, onam unga Islom dinini tushuntira boshladi. Bilmadim, u ayol Islomni qabul qildimi-yo‘qmi, lekin ushbu hayotiy voqeani aytishimdan maqsad: musulmonmi yoki yo‘q, namoz paytida e’tibor bilan ibodat qilinsa, inson albatta xotirjamlik va ruhiy jihatdan orom topadi. Namoz, bu – iymonni mustahkamlaydigan asosiy kalitlardan biridir.

Manba: islom.uz