G‘allaorol va Zafarobodda kelinlik sarpolari MIB tomonidan olib berildi

Byuroning G‘allaorol va Zafarobod tuman bo‘limlarida kelinlik sarpolari va boshqa mol-mulklar bo‘yicha nizoga chek qo‘yildi. Fuqarolik ishlari bo‘yicha sudlarning qarorlari asosida qarzdorlarning mol-mulklari undiruvchilarga qaytarilishi ta’minlangan.

Ma’lum bo‘lishicha, sobiq turmush o‘rtoqlar o‘rtasidagi mulkiy nizo kelinlik sarpolariga ham ta’sir etgan. Ayollar o‘zlariga tegishli bo‘lgan sarpolarni sobiq turmush o‘rtoqlarining uylaridan olib ketishga uringanlarida qarshilikka uchraganlar. Kelinlik sarpolari yangi hayot boshlash uchun muhim bo‘lganligi sababli, ayollar o‘z huquqlarini himoya qilish uchun sudga murojaat qilishga majbur bo‘lishgan.

Sud qarorlariga asosan Byuroning G‘allaorol va Zafarobod tuman bo‘limlariga qarzdorlardan undiruvchilar foydasiga 52 turdagi mol-mulkni olib berish belgilangan.

Ijro harakatlari natijasida undiruvchilarning barcha mol-mulklari, shu jumladan kelinlik sarpolari ham, to‘liqligicha qaytarib berildi va ijro hujjatlarining ijrosi tamomlandi.