“M&Mʼs” qadog‘iga yashirilgan og‘u

Qonunbuzarlar o‘zlarining nopok maqsadlarini amalga oshirish yo‘lida kishi xayoliga kelmaydigan turli usullardan foydalanayotir. Ana shunday holatlardan biri Toshkent shahrida yuz berdi.

Bir guruh shaxslar huquqni muhofaza qiluvchi organ xodimlarini chalg‘itish orqali o‘z rejalarini amalga oshirmoqchi bo‘ldi. Ya’ni tijorat maqsadida muntazam ravishda Turkiya davlatiga qatnovchi angrenlik Z.R. bu safar o‘zi bilan 38,78 gramm MDMA hamda 0,85 gramm metamfetamin giyohvandlik vositalari “M&Mʼs”shirinliklariga yashirib qadoqlangan holda olib keladi. Bojxona tekshiruvi paytida esa uni farg‘onalik X.A.ga berayotgan vaqtida huquqni muhofaza qiluvchi organ xodimlari tomonidan voqea joyida qo‘lga olindi.

Olib borilgan surishtiruv ishlari natijasida, ushbu giyohvandlik vositalari asli Farg‘onaning Qo‘qon shahrida yashovchi, hozirda Turkiya davlatida bo‘lgan M.A. tomonidan Qo‘qon shahrida yashovchi SH.P.ga pochta sifatida berib yuborilgan ekan. Holat yuzasidan jinoyat ishi qo‘zg‘atilib, tergov harakatlari davom ettirilmoqda.

Guvohi bo‘lganingizdek, o‘z nafsi yo‘lida ushbu zahri qotilni yurtimizga olib kirish uchun bolalarning sevimli shirinliklaridan ham foydalanishdan toymagan bu kimsalar o‘zlarini qanchalar ehtiyotkor, deb bilsalar, huquqni muhofaza qiluvchi organ xodimlari ulardan ham hushyor aslida.

Aytib o‘tish kerakki, narkotik moddalarning noqonuniy aylanmasi, tranziti va iste’moliga chek qo‘yish maqsadida keng ko‘lamli ishlar amalga oshirilmoqda. 26 iyun – Xalqaro giyohvandlikka va giyohvandlik vositalarining noqonuniy aylanishiga qarshi kurash kuni munosabati bilan hamda Narkotik moddalarni nazorat qilish Davlat komissiyasi tomonidan tasdiqlangan “Giyohvandlikka qarshi kurash oyligi” doirasida respublika huquqni muhofaza qilish idoralari tomonidan noqonuniy muomaladan musodara qilingan giyohvandlik vositalarini yo‘q qilish bo‘yicha navbatdagi tadbir o‘tkazildi. Unda 1 tonnadan ziyod giyohvandlik vositalari va turli xildagi psixotrop hamda psixofaol moddalar yoqib, yo‘q qilindi.

2019 yilda ham narkotik moddalar va ularning analoglari noqonuniy aylanmasiga chek qo‘yish borasida ham ichki ishlar organlari xodimlari tomonidan yuksak mas’uliyat va e’tibor bilan ish olib borilmoqda. Natijada o‘tgan 6 oy davomida 1,5 mingdan ortiq shaxs qo‘lga olinib, ularni 313 kilogrammdan ziyod giyohvandlik vositalari daliliy ashyo sifatida olindi.

Bundan tashqari, joriy yil 1 maydan 30 iyunga qadar O‘zbekiston Respublikasining barcha hududlarida “Qora dori-2019” keng qamrovli tadbirining birinchi bosqichi o‘tkazildi. Unda respublika bo‘ylab barcha huquqni muhofaza qiluvchi organ vakillari, ular qatorida 9 mingdan ortiq ichki ishlar organlari xodimlari hamda 3,5 mingdan ziyod jamoatchilik, korxona, tashkilot va hokimiyat vakillari jalb qilindi. Narkotik moddalarni kontrabandasini oldini olish maqsadida, chegaraoldi va tog‘li hududlarda, shuningdek aylanma yo‘llarda 361 ta ko‘chma harakatlanuvchi postlar va 303 ta to‘siq guruhlari faoliyat ko‘rsatmoqda.

“Qora dori-2019” keng qamrovli tadbirining birinchi bosqichi mobaynida respublika bo‘yicha giyohvandlik vositalari bilan bog‘liq jami 1 ming 48 ta holat aniqlanib, jami 174 kilogramm 987 gramm narkotik moddalar olindi.Shulardan narkotik moddalarni o‘tkazish bilan bog‘liq 251 ta, tarkibida giyohvandlik vositalari bo‘lgan o‘simliklarni yetkazish bilan bog‘liq 491 ta jinoyat fosh etildi.

Shuningdek, tadbir davomida umumiy 2 363 kv.m yer maydonida tarkibida narkotik vositalari mavjud o‘simliklar ekib yetishtirilganligi aniqlanib, yo‘q qilindi.

“Qora dori - 2019” keng qamrovli tadbirining birinchi bosqichida vazirlikning Giyohvandlik vositalari bilan qonunga xilof ravishda muomala qilishga qarshi kurashish boshqarmasi xodimlari tomonidan 25 kun mobaynida AS-532 rusumli vertolyotda amalga oshirilgan nazoratli uchishlar natijasida 84 ta holat aniqlanib, 348 kv.m. yer maydonida tarkibida narkotik moddalari bo‘lgan o‘simliklarni yetishtirish bilan bog‘liq jinoyatlar aniqlanib, noqonuniy muomaladan jami 9 kilogrammdan ortiq narkotik moddalar olindi.

Qayd etilgan raqamlar zamirida huquqni muhofaza qiluvchi organ xodimlarining tinimsiz og‘ir mehnati va xizmati yotibdi. Ammo mazkur natijalar bilan xotirjamlikka berilib bo‘lmaydi, chunki bu boradagi bitta jinoyat ham davlat va jamiyatning rivojiga to‘g‘onoq bo‘lishi mumkin.

Aynan ushbu omillar inobatga olingan holda respublikamiz hududidagi katta miqdorda giyohvandlik vositalarini kontrabandasi bilan shug‘ullanayotgan jinoiy guruhlarni, shuningdek tarkibida giyohvandlik moddalari bo‘lgan o‘simliklarni yetishtirayotgan shaxslarni aniqlash va ularning jinoiy faoliyatlariga chek qo‘yishga qaratilgan tezkor ishlar davom ettirilmoqda.

Mirzo Ulug‘bek MADALIMOV,

IIV Jamoatchilik va OAV bilan

aloqalar boshqarmasi xodimi.