Evro-2024. Ispaniya finalda Angliyani mag‘lubiyatga uchratdi
Evropa chempionati finali doirasida Ispaniya Angliyani mag‘lub etib, chempionga aylandi.
Final Berlindagi «Olimpiashtadion»da o‘tkazildi. Hal qiluvchi bahsning birinchi bo‘limi ispanlar ustunligida o‘tgan bo‘lsa-da, hisob ochilmadi. Ikkinchi bo‘lim boshida esa Niko Uilyamsning golidan keyin ispanlar oldinga chiqib oldi.
70-daqiqada zaxiradan maydonga tushgan Koul Palmer uch daqiqa o‘tib, kuchli zarbasi bilan farqni tenglashtirdi – 1:1.
O‘yin yakuniga yaqin ispanlar safida zaxiradan maydonga tushgan Oyarsabal 86-daqiqada gol urib, Ispaniyaga qit’a chempionligini keltirdi – 2:1.
Shu tariqa, Angliya ketma-ket ikkinchi Yevro finalida mag‘lubiyatga uchragan bo‘lsa, Ispaniya o‘z tarixida 4-marta qit’a chempioni bo‘ldi va bu borada rekordchiga aylandi.
