Зимбабве ҳукумати қурғоқчиликдан қочиш учун 200 та филни ўлдирмоқчи

Зимбабве атроф-муҳитни муҳофаза қилиш вазирлиги мамлакатда филлар жуда кўп эканлигини маълум қилди. ZimParks ёввойи табиат боғи раҳбариятига ўлдириладиган ҳайвонларни танлаш вазифаси юкланди, деб хабар беради BILD.

Расмийларнинг таъкидлашича, бу ҳаракат тез ўсиб бораётган филлар популяциясини назорат қилиш ва ҳаддан ташқари қурғоқчилик оқибатларини юмшатишга ёрдам беради.

ZimParks қўриқхонаси раҳбари Фултон Мангваньянинг AFPга айтишича, расмийлар жами 200 та филдан халос бўлишни мақсад қилган.

Зимбабведа жами 100 000 га яқин фил яшайди, мамлакат бу ҳайвонлар сони бўйича Ботсванадан кейин иккинчи ўринда туради.

Зимбабведа филлар охирги марта 1988 йилда отилган.

Аввалроқ Намибия сўнгги ўн йилликдаги энг кучли қурғоқчилик туфайли 700 та ёввойи ҳайвонлар, жумладан, фил ва бегемотлар йўқ қилинишини маълум қилганди. Намибия Атроф-муҳит вазирлиги 160 га яқин жониворнинг ўлдирилганини маълум қилди.

Ушбу чора сув ресурсларини истеъмол қилишни енгиллаштириш ва қурғоқчилик туфайли оч қолган минглаб одамларни гўшт билан таъминлаш учун ишлаб чиқилган. Ҳукуматнинг буйруғи ҳайвонлар ҳуқуқлари фаоллари томонидан қаттиқ танқид қилинди.

Қурғоқчилик туфайли фавқулодда ҳолат эълон қилган жанубий Африка давлатлари қаторида Зимбабве ва Намибия ҳам бор.