Зеленский: Украина урушда ғалаба қозониш режасини тўлиқ тайёрлаб қўйган
Украина президенти Владимир Зеленский Киев Россия билан урушда ғалаба қозониш режаси устида ишлашни якунлаганини айтди.
Аввалроқ у бундай ҳужжат «90 фоиз тайёр» ва тез орада иттифоқчиларга топширилиши ҳақида хабар берган эди.
«Бизнинг ғалаба режамиз аллақачон тўлиқ тайёрланган, барча нуқталар, барча асосий урғулар, режага тафсилотлар билан зарур қўшимчалар аниқланган. Ҳаммаси ишлаб чиқилган. Ҳозир энг муҳими – амалга оширишдаги қатъият», — деди Зеленский кечки нутқида.
АҚШ Давлат департаменти матбуот котиби Мэтю Миллер шу ҳафта АҚШ Давлат котиби Энтони Блинкенга Украинанинг Россияга урушни тугатиш учун босим ўтказиш режасининг элементлари ҳақида маълумот берилганини айтди.
Август ойида Зеленский Украина режасида дипломатик ва иқтисодий жабҳада қўшимча қадамлар, жумладан, Россияни урушни дипломатик йўл билан тугатишга мажбурлаш учун кучли пакет ҳам борлигини айтди.
Чоршанба кунги мурожаатида Зеленский, шунингдек, унинг режаси можарони ҳеч қандай шаклда музлатишни назарда тутмаслигини таъкидлади.
