“Чимён” сиҳатгоҳида ёнғин келиб чиқди

Фарғона туманида жойлашган “Чимён чашмаси” сиҳатгоҳи биносида келиб чиққан ёнғин натижасида 500 метр квадрат майдон ёнган. Бу ҳақда ФВВ матбуот хизмати маълум қилди.

Айтилишича, ёнғин 21 август куни 18:13 да келиб чиққан ва соат 19:30 да бартараф этилган

Бу учун 12 та махсус техника жалб қилинган ва бинонинг 4500 квадрат метр майдони ёнғиндан сақлаб қолинган.

Ёнғин бинонинг том қисмида қуёш панели ўрнатиш вақтида пайвандчиларнинг техник хатоси ортидан тез ёнувчи қопламаларга ўт кетишидан келиб чиққан, дейилади вазирлик ахборотида.

Қўшимча қилинишича, ёнғин оқибатида вафот этган ёки тан жароҳати олганлар ҳақида хабар келиб тушмаган.