Вьетнамдаги “Яги” тўфони қурбонлари сони 233 кишига етди

Вьетнамда “Яги” тўфони қурбонлари сони ортиб бормоқда. Расмийлар 233 кишининг ўлимини тасдиқлади. 800 киши жароҳатланган. Яна 103 киши бедарак йўқолганлар рўйхатида, деб хабар беради Euronews.

Уларнинг ярмига яқини вайроналарга айланган Лаокай провинциясидаги Ланг Ну қишлоғи аҳолисидир. Бўрон сабаб кучли ёмғир туфайли у ерда кўчкилар содир бўлиб, маҳаллий дарёлар каналларидан тошиб кетган.

Омон қолганларни қидириш учун 500 га яқин қутқарувчи сафарбар қилинган. Аммо зарар кўрган ҳудудга оғир техникани етказиб беришнинг иложи йўқ: йўллар ёпилган ёки ювилган.

Яги Вьетнамга шанба куни етиб келди. Шамол тезлиги соатига 145 километрни ташкил этган. Якшанба куни у пасайди, аммо шу кунларда кучли ёмғир тўхтамади.

Осиёдаги энг кучли тайфунлардан бири ҳисобланган Яги Филиппинда кучайиб, жанубий Хитойга таъсир кўрсатди. Таиланднинг шимолий ҳудудлари зарар кўрди, у ерда бир қанча қирғоқ бўйидаги аҳоли пунктлари сув остида қолди.

Кучли ёмғир туфайли кўчкилар юзага келган Чианграй провинциясида камида олти киши ҳалок бўлди. Расмийлар сув сатҳи ҳамон кўтарилаётганидан огоҳлантирган. Улар аҳолидан баландроқ жойга кўчиб ўтишларини сўрамоқда.

Климатологларнинг фикрича, бундай экстремал об-ҳаво ҳодисалари инсон фаолияти натижасида юзага келган иқлим ўзгариши билан бевосита боғлиқ.