Тошкентда ҳоким ёрдамчиси ўз онасини аёвсиз калтаклади
![Тошкентда ҳоким ёрдамчиси ўз онасини аёвсиз калтаклади Тошкентда ҳоким ёрдамчиси ўз онасини аёвсиз калтаклади](/photos/news/QZRfnCtoLR9GIBy.jpeg)
Аввалроқ ижтимоий тармоқларда Тошкент шаҳрининг Мирзо Улуғбек тумани ҳокими ёрдамчисининг онаси қаттиқ калтаклагани ҳақида маълумот тарқалган эди.
Жорий йилнинг 16 июль куни Мирзо Улуғбек туманидаги хонадонлардан бирида 65 ёшли М.И. калтаклангани ҳақида Тошкент шаҳар ИИББ матбуот хизмати darakchi.uz'га маълумот берди.
Мазкур ҳолат юзасидан ЖКнинг 105-моддаси (қасддан баданга ўртача оғирликдаги шикаст етказиш) билан жиноят иши қўзғатилган.
ИИББнинг таъкидлашича, айни дамда кекса аёлнинг калтакланишига айнан ким сабабчи бўлганлиги аниқланмаган. Жабрланувчининг ўзи ўғлига эмас, келинига қарши кўрсатма бермоқда.
Шунингдек, фуқаро М.И.да аниқланган тан жароҳатини оғирлик даражасини ҳамда руҳий ҳолатини аниқлаш мақсадида, судга оид тиббий ва психиатрик экспертиза тайинланган. Тергов давом этмоқда.
Шаҳар ҳокимлиги матбуот хизмати Мирзо Улуғбек тумани ҳокими ёрдамчиси тергов якунига қадар ўз вазифасидан четлаштирилганини маълум қилди.