«Ҳоким стипендияси», «Телефонсиз мактаб», чет тилини билиш сертификатига эга ёшларни рағбатлантириш — Ширин ҳокимининг учта муҳим қарори чиқди

Ширин шаҳар ҳокими Ниёз Хазратқулов мактабларда таълим сифатини ошириш, иқтидорли ёшларни қўллаб-қувватлаш ҳамда рағбатлантиришга доир бир қатор қарорларни имзолади.

Жумладан, ҳоким қарори билан йил давомида намунали хулқ ва аъло баҳоларга ўқиб, энг юқори рейтинг кўрсаткичларига эришган 10-11 синф ўқувчилари учун «Ҳоким стипендияси» таъсис этилди. Низомга кўра, танлов ғолиблари 3 та ўринда аниқланади. 1-ўрин учун 1,5 млн сўм, 2-ўрин учун 1 млн сўм, 3-ўрин учун 500 минг сўм миқдоридаги бир марталик стипендия тўлаб берилади.

Шунингдек, шаҳар мактабларида телефондан фойдаланишни тартибга солиш мақсадида «Телефонсиз мактаб» тизими татбиқ килинмоқда. Лойиҳани фаол қўллаб-қувватлаган 2 та мактаб 5 млн сўм пул мукофоти ҳамда китоблар тўплами билан тақдирланади.

Ҳокимнинг яна бир қарорига кўра, хорижий тилларни билиш бўйича B2 даражадаги миллий ёки унга тенглаштирилган мос даражадаги халқаро сертификатга эга бўлган ёшларни 500 минг сўм, шунингдек, C1 даражадаги сертификатга эга ёшларни 1 млн сўм миқдорида бир марталик моддий рағбатлантириш кўзда тутилган.