Тиаго Месси дадасининг энг чиройли голи ҳақида гапирди
Лионел Мессининг ўғли отасининг қайси голи унга ёқишини айтди.
«Отамнинг энг чиройли голи — Чемпионлар Лигаси финалида «Манчестер Юнайтед» дарвозасига боши билан киритган тўпи», — деди Тиаго Месси журналист Хосе Рамон де ла Моренага берган интервюсида.
«Барселона»да ўйнаган Аргентина миллий жамоаси ҳужумчиси 2009 йили манкунианликларга қарши ЕЧЛ финалида 70-дақиқада гол урган. Каталонияликлар 2:0 ҳисобида зафар қучиб, чемпион бўлишган.
Шунингдек, 11 ёшли Тиаго келажакда қайси футболчи билан бирга ўйнамоқчилигини айтди.
«Ўзим футбол ўйнаганимда дадамнинг ўйинини томоша қилганимдан кўра кўпроқ асабийлашаман. Мен чап оёғим билан унчалик яхши ўйнамайман.
Аргентина миллий жамоасида ўйнашни хоҳлайман. Ва бир кун келиб, Ламин Ямал билан бир клубда тўп тепишни ҳам истайман», — дейди Мессининг ўғли.
