Путиннинг рейтинги тушиб кетди

Бутунроссия Жамоатчилик фикрини ўрганиш маркази (ВЦИОМ) Россия Федерацияси президенти фаолиятини маъқуллаш рейтинги ва Владимир Путинга бўлган ишонч рейтинги пасайганини қайд этди.

ВЦИОМ веб-сайтидаги хабарда айтилишича, Россия Федерацияси Президентининг 12-18 август кунлари бўлган ҳафталик фаолиятини маъқуллаш рейтинги 3,5 фоиз пунктга пасайиб, 73,6 фоизга тушган. Бир ҳафта аввал, 5 августдан 11 августгача бу кўрсаткич 77,1 фоизни ташкил қилган эди. Респондентларга «Умуман олганда, сиз президент фаолиятини маъқуллайсизми ёки йўқми?» деган савол берилди.

ВЦИОМ маълумотларига кўра, Путинга бўлган ишонч даражаси бир вақтнинг ўзида 2,6 фоиз пунктга пасайиб, 78,2 фоизни ташкил қилган (бир ҳафта аввал – 80,8 фоиз). Сўров иштирокчиларидан: «Илтимос, айтингчи, Владимир Владимирович Путинга ишонасизми ёки ишонмайсизми?», деб сўралган.

ВЦИОМ маълумотларига кўра, бу 2022 йил февралида Россиянинг Украинага бостириб кириши бошланганидан бери бу икки кўрсаткич бўйича рекорд даражадаги пасайишдир.

Агентликнинг қўшимча қилишича, Путин рейтингининг пасайиши «Ижтимоий фикр» жамғармаси (ФОМ) томонидан ҳам қайд этилган. «Левада-центр» ўз маълумотларини август охирида тақдим этишни режалаштирмоқда.