Кельн марказида портлаш содир бўлди
Германия полицияси Кельн шаҳрининг тарихий қисмида жойлашган «Vanity Club Cologne» клубида юз берган портлаш юзасидан терговни бошлади.
Немис матбуотига кўра, портлаш маҳаллий вақт билан 5:58 да содир бўлган. Камида бир киши жабрланган - оғир ярадор касалхонага ётқизилган. Қурбонлар ҳақида расмий маълумот йўқ.
Видеокузатув камераси тасвирларидан кўриниб турибдики, воқеа содир бўлишидан бироз аввал қалпоқ кийган эркак клуб эшигига яқинлашиб, сумкасини ташлаб кетган.
Портлаш натижасида бинонинг бир қисми вайрон бўлган, ўт ўчирувчилар воқеа жойига етиб келган, бироқ ёнғинни ўчиришга ҳожат қолмаган; Клуб яқинидаги ҳудуд полиция томонидан ўраб олинган ва ҳуқуқ-тартибот идоралари ходимлари суриштирув ишларини бошлаган.
Терговчилар воқеани уюшган жиноятчилик билан боғлиқ бошқа ҳодисалар билан боғлашмаган.
